Read Biblia SEPT Eclesiástico 16 Bible Online

Eclesiástico 16 - Biblia SEPT bible

Eclesiástico 16

¹Non te deleites no bo parecer de mozos nugalláns nin goces en ter fillos impíos:

²Aínda que fosen moitos, non te aledes neles se lles falta o temor do Señor;

³non confíes en que estean vivos nin esperes no seu porvir: non van ter unha boa posteridade; pois mellor é un que fai o seu debido ca non milleiros, e morrer sen fillos mellor é que ter descendentes soberbios.

⁴Por un que tema a Deus xa se enche unha vila, mentres un fato de perversos a arruína.

⁵Moitos casos semellantes teño eu visto e o meu oído escoitou meirandes cousas:

⁶Contra unha morea de malvados foi prendido o lume, contra unha nación impía alampou a ira;

⁷non deixou impunes os xigantes antigos que se revolveron na súa arrogancia;

⁸nin perdoou os conveciños de Lot ó se excederen con fachenda;

⁹tampouco houbo piedade para o pobo danado, que foi desposuído pola súa culpa;

¹⁰tal aconteceu ós seiscentos mil de a pé exterminados polo seu ánimo orgulloso,

¹¹de xeito que aínda que fose un só o teimudo, milagre sería que ficase impune. Verdade é que nel van xuntas misericordia e carraxe, e que transixe e perdoa, mais sobre os pecadores bota o seu furor.

¹²Grande coma a súa compaixón é o seu castigo e xulga a cadaquén de acordo cos seus feitos.

¹³Non fuxirá o malvado co seu furto nin constantemente será o xusto privado da súa esperanza.

¹⁴Para quen faga esmola haberá premio e cadaquén será tratado de acordo coas súas obras.

¹⁶As súas misericordias están á vista de todas as criaturas, El reparte luz e tebra ós seres humanos.

¹⁷Non digas: —"Escondinme de Deus, quen se vai acordar de min alá arriba? Entre tanta xente non me recoñecerán que son eu entre tal multitude de persoas?

¹⁸Velaí os ceos e o máis alto dos ceos, o océano e mais a terra: cando descende para eles, tremen, cando pasa revista, abanéanse.

¹⁹Tamén os raigaños dos montes e os alicerces do orbe conmóvense cando Deus lles bota unha ollada.

²⁰Pero en min non vai reparar, quen descubrirá o meu proceder?

²¹Se peco, ninguén me verá se minto ás furtadelas, quen o sabe?

²²E quen lle vai ir contar as miñas boas obras? Que esperanza vou ter se cumpro co debido?"

²³Xente sen siso matina deste xeito, tal é o pensar dos parvos.

²⁴Escoitádeme e aprendede da miña discreción, poñede atención nas miñas verbas;

²⁵vou expoñer con tino o meu pensamento e a dar razón con xusteza do que eu sei:

²⁶Cando no comezo Deus creou as súas obras, non ben existiron, distribuíulles os papeis;

²⁷organizoulles para sempre as tarefas e os seus elementos por xeracións. Nin pasan fame nin cansan nin fallan nos seus traballos,

²⁸ningunha molesta á súa veciña e endexamais non desobedecen o seu mandado.

²⁹Despois ollou o Señor para a terra e encheuna cos seus bens;

³⁰cubriulle a faciana con toda caste de viventes que a ela deberán volver.