Read Biblia SEPT Eclesiástico 17 Bible Online

Eclesiástico 17 - Biblia SEPT bible

Eclesiástico 17

¹Da terra creou o Señor ó home e de novo faino volver a ela.

²Concedeulles días contados, un tempo xusto e deixou no seu poder canto hai sobre ela,

³revestiunos dunha forza coma a súa e fíxoos á súa imaxe,

⁴impuxo o temor do home en toda criatura para que impoña o seu dominio nas bestas e nas aves.

⁶Dotounos de discernimento, lingua e ollos, deulles oídos e unha mente para cavilar;

⁷encheunos de sabedoría e intelixencia, mostroulles o ben e o mal;

⁸púxolles a súa luz nos corazóns para lles amosar a magnitude das súas obras,

⁹de xeito que pregoen a grandeza dos seus feitos

¹⁰e loen o nome santo.

¹¹Engadiulles a ciencia e concedeulles en herdanza a lei da vida.

¹²Concluíu con eles unha alianza eterna e deulles a coñecer as súas determinacións;

¹³cos propios ollos contemplaron a dimensión da súa gloria e os seus oídos escoitaron a súa voz magnífica;

¹⁴e díxolles: —"Gardádevos de toda impiedade"; e deu a cadaquén mandatos verbo do seu próximo.

¹⁵A súa conduta tena sempre diante, non se esconde ós seus ollos.

¹⁷A cada pobo púxolle un gobernante mais Israel é a porción do Señor.

¹⁹Todas as súas accións son para El manifestas coma o sol e os seus ollos pousan decote nos camiños deles,

²⁰nin lle foxen as inxustizas que fan e todos os seus pecados fican diante do Señor.

²²A esmola que un home fai vale para El coma un selo e o favor feito gárdao coma a propia pupila;

²³erguerase polo tanto para recompensalos e fará recaer sobre cadaquén o que lle cómpre.

²⁴Os que se arrepintan permitiralles volver e dará consolo ós que perdan a esperanza.

²⁵Volve ó Señor e deixa os pecados prega diante del e reduce as caídas;

²⁶torna para o Altísimo e afástate da inxustiza, refuga con forte pulo a iniquidade;

²⁷pois quen vai loar o Altísimo no Hades igual que o fan os que viven confesándoo?

²⁸Para un morto que xa non existe rematou a loanza; é o vivo e quen ten saúde quen loa ó Señor.

²⁹Que grande é a piedade do Señor e o perdón para os que volven cara a El!

³⁰Pois entre homes non todo é posible xa que o ser humano non é inmortal.

³¹Que cousa hai máis resplandecente có sol? Non obstante eclípsase.

³²El é quen pasa revista ó exército das alturas do ceo mentres que os homes todos son terra e cinsa.