Read Biblia SEPT Eclesiástico 18 Bible Online

Eclesiástico 18 - Biblia SEPT bible

Eclesiástico 18

¹Aquel que vive eternamente creou todo xunto.

²Só o Señor leva razón.

⁴A ninguén lle foi dado o poder proclamar as súas obras. Quen pescudará as súas grandezas?

⁵Quen calculará o poderío da súa maxestade ou quen poderá narrar as súas misericordias?

⁶Non se lle pode minguar nin engadir nin é doado descubrir as marabillas do Señor.

⁷Cando o home remata, entón comeza El; se un para a pensar, fica abraiado.

⁸Que é o home? Para que vale? Que ten de bo ou de malo?

⁹O número dos días do home coma moito son cen anos.

¹⁰Coma unha pinga de auga do mar ou un gran de area, así son os seus poucos anos perante o día eterno.

¹¹Velaquí por que Deus ten mesura con eles e esparexe sobre eles a súa piedade;

¹²El ben sabe que o seu remate é miserento, por iso fai medrar o perdón.

¹³O home ten piedade do seu próximo mais o Señor apiádase de todo canto vive reprendendo, corrixindo, ensinando e recuperando, coma o pastor a súa grea.

¹⁴Apiádase dos que acollen a corrección e dos que aceptan as súas disposicións.

¹⁵Meu fillo, cando fagas beneficios, non os mestures con críticas nin verbas molestas con dádivas.

¹⁶Non calma o orballo a quentura? Pois a palabra fai mellorar a dádiva.

¹⁷Abofé, máis vale unha palabra ca un bo regalo; ámbolos dous atópanse no home cortés.

¹⁸O insensato aldraxa de malas maneiras e a dádiva do envexoso irrita os ollos.

¹⁹Antes de falares, instrúete; antes de caeres enfermo, cóidate;

²⁰Antes de seres xulgado, examínate: cando se che pidan contas serás perdoado;

²¹Antes de enfermares, humíllate; e cando peques, mostra que te arrepintes;

²²nada te demore en cumprir un voto ó seu tempo, non esperes a morte para pagar a débeda.

²³Antes de faceres promesa, prepárate; non sexas coma quen tenta ó Señor.

²⁴Pensa na carraxe dos últimos días, no momento da vinganza, cando El torna a face.

²⁵Lembra a fame no tempo da fartura, a pobreza e a miseria no tempo da riqueza.

²⁶Do amencer ó solpor o tempo cambia, todo pasa axiña ante o Señor.

²⁷O home sabio mantense sempre presto, no tempo de pecados presérvase da falta.

²⁸Todo home asisado coñece a Sabedoría, quen dá con ela merece ser loado;

²⁹tamén os de razóns sutís se fan sabios facendo chover ditos axustados.

³⁰Meu fillo, non te deixes levar das túas paixóns, frea os teus degoiros,

³¹pois se dás solta á satisfacción do teu desexo, faraste motivo de riso para o teu inimigo.

³²Non te aledes por un momento de pracer que vai dar nunha pobreza dobrada.

³³Non sexas lambón nin bébedo, se ter o peto baleiro.