Read Biblia SEPT Eclesiástico 19 Bible Online

Eclesiástico 19 - Biblia SEPT bible

Eclesiástico 19

¹Quen tal fai non chegará a rico, quen desbota o pequeno arruínase ós poucos.

²O viño e as mulleres volven o ánimo lercho e quen se xunta con rameiras faise máis desvergonzado aínda;

³A podremia e os vermes farán presa del, pois o temerario será aniquilado.

⁴O que axiña confía é un espírito lixeiro e quen peca faise mal a si mesmo;

⁵quen se goza no mal será danado,

⁶quen aborrece as lerias diminúe en malicia.

⁷Non vaias repetindo unha leria e ninguén te amolará;

⁸non leves contos a amigo nin inimigo e se non é con dano teu, non o reveles,

⁹doutro xeito quen te escoite gardarase de ti e chegará a odiarte.

¹⁰Escoitaches algo? —Que morra contigo! Resiste, que non vas estoupar.

¹¹Diante dunha noticia o insensato entra en dores coma a parturiente ó chegar o neno.

¹²Coma unha frecha espetada na coxa é unha noticia na entraña do parvo.

¹³Inquire do teu amigo; pode que non fixese nada, e se fixo algo, para que non continúe.

¹⁴Inquire do veciño; pode que non dixese nada, e se dixo algo, para que non o repita.

¹⁵Inquire do teu amigo: dinse tantas calumnias! Non deas creto a todo o que se fala!

¹⁶Tamén hai quen esvara sen pretendelo. Quen hai que nunca pecase coa lingua?

¹⁷Inquire do teu veciño antes de chegares ás ameazas, e deixa lugar á lei do Altísimo.

²⁰O temor de Deus é o celme de toda Sabedoría e en toda Sabedoría hai cumprimento da lei.

²²Non é Sabedoría coñecer a malicia, nin prudencia o matinar dos pecadores.

²³Hai unha habilidade que é abominable como existe un parvo que carece de Sabedoría.

²⁴Mellor é o minguado de siso, máis temeroso có que abonda en intelixencia e viola a lei.

²⁵Hai sagacidade sutil, mais inxusta: a de quen recorre a manexos para se dar aires de recto.

²⁶Hai quen camiña cangado pola coita, mais no seu interior está cheo de engano;

²⁷baixa a cabeza, faise o xordo, mais cando non te decatas aprovéitase de ti;

²⁸e se por falta de forzas non pode pecar, cando atope ocasión fará o mal.

²⁹Polo aspecto coñécese o home e polo porte da faciana o sabio.

³⁰O atavío dun home, o riso dos seus labios e o xeito de camiñar amosan o seu carácter.