Read Biblia SEPT Eclesiástico 2 Bible Online

Eclesiástico 2 - Biblia SEPT bible

Eclesiástico 2

¹Filliño, se te achegas a servir o Señor, prepárate para a proba;

²ten firme o corazón, se constante, non te axites no intre da conmoción;

³Apégate a El, non te lle afastes e ó remate serás exaltado.

⁴Canto che veña enriba, acéptao, aínda na doenza e na pobreza, ten paciencia.

⁵Pois no lume próbase o ouro e os homes elixidos, na forxa da humillación.

⁶Afiúnza nel, e hache axudar, endereita os teus camiños e espera nel.

⁷Vós, que temedes o Señor, agardade a súa misericordia e non vos extraviedes para non caer.

⁸Vós que temedes o Señor, afiuzade nel non se vos negará a paga ó vir a noite.

⁹Vós que temedes o Señor, esperade bens, eterna ledicia e misericordia.

¹⁰Considerádevos das xeracións antigas e ollade: quen afiuzou no Señor e foi avergonzado? Ou quen perseverou no seu temor e foi desatendido? Ou quen berrou por El e foi pasado por alto?

¹¹Pois o Señor é compasivo e piadoso, perdoa o pecado e salva na hora da angustia.

¹²Malia os corazóns covardes e as mans febles e o pecador que discorre por dobre vieiro!

¹³Malia o corazón que afrouxa porque non cre pois ficará sen protección!

¹⁴Malia vós que desbotastes a perseveranza! Que faredes cando o Señor vos veña pedir contas?

¹⁵Os que temen o Señor non transgriden os seus mandados e os que o aman gardan os seus camiños.

¹⁶Os que temen o Señor procuran compracelo e os que o aman cumpren coa lei.

¹⁷Os que temen o Señor teñen o corazón disposto e saben facerse pequenos diante del.

¹⁸Botémonos nas mans do Señor que non nas mans dos homes!, pois tal como é a súa maxestade tamén é a súa piedade.