Read Biblia SEPT Eclesiástico 21 Bible Online

Eclesiástico 21 - Biblia SEPT bible

Eclesiástico 21

¹Se pecaches, meu fillo, non o fagas máis, e pide perdón polas culpas pasadas;

²fuxe do pecado coma da cóbrega: se te lle achegas, hate rillar, os seus dentes son dentes de león que tollen a vida dos homes.

³Toda transgresión é coma espada de dous fíos, non ten cura a súa ferida.

⁴O terror e a violencia arrasan a facenda e o casal do soberbio tamén será arrincado.

⁵O laio do pobre vai da súa boca ós oídos de Deus, o seu veredicto chegará de súpeto.

⁶Quen refuga a corrección vai tralas pegadas do pecador, mais quen teme ó Señor convértese de corazón.

⁷De lonxe descóbrese ó farfallán, mais o asisado sabe cando esvara.

⁸Quen constrúe a súa casa co diñeiro doutros é coma quen amorea pedras para o seu sartego.

⁹O fato dos impíos é un feixe de estopa e o seu final, unha labarada.

¹⁰O carreiro dos pecadores está ben lousado, mais remata no abismo do Xeol.

¹¹O que garda a lei enxuga os seus instintos, e o temor do Señor é o celme da Sabedoría.

¹²Non se poderá instruír quen non sexa espelido, se ben hai habelencia que enche de amargura.

¹³O saber do Sabio reborda coma a enxurrada, o seu parecer é coma fonte viva.

¹⁴A mente do parvo é coma sella fendida: non pode conter saber ningún.

¹⁵Se un home instruído escoita unha verba sabia pode apreciala, e aínda lle engade do seu; tamén a escoita o toleirán, mais búrlase dela e bótaa ás costas.

¹⁶O relato do parvo é coma ter que facer camiño cun fardelo, mais nos labios do intelixente atópase a graza.

¹⁷Na reunión procúrase o parecer do prudente, as súas razóns darán en que matinar.

¹⁸Para o necio a Sabedoría é coma un casal arruinado, a ciencia do home sen siso son verbas sen xeito nin dereito.

¹⁹A disciplina é para o parvo coma pexas nos pés, coma ter encadeada a man dereita.

²⁰O necio ri ás gargalladas, o sabio sorrí polo baixo.

²¹Orla de ouro é a instrución para o asisado, coma un brazalete no seu brazo dereito.

²²AO pé do necio entra nunha casa ás présas, bo home de boas maneiras agarda fóra.

²³AO insensato desde a porta axexa a casa, ba un home de mundo daríalle rubor.

²⁴É de mal educado andar escoitando tralas portas, para o prudente sería unha vergonza.

²⁵Labios sen xeito argallan en cousas alleas, mais as verbas dos prudentes sopésanse na balanza.

²⁶Na boca teñen os parvos a súa mente, na mente teñen os sabios a súa boca.

²⁷Cando o impío maldí a Satanás estase a maldicir a si mesmo.

²⁸A si mesmo se lixa o murmurador e aborréceno todos na bisbarra.