Read Biblia SEPT Eclesiástico 22 Bible Online

Eclesiástico 22 - Biblia SEPT bible

Eclesiástico 22

¹O preguiceiro semella un pelouro emporcado, todo o mundo lle asubía do noxo que dá.

²O preguiceiro semella unha bosta, quenquera que a toque sacode a man.

³Vergonza é para un pai dar vida a un fillo malcriado, tamén é boa perda que lle naza unha filla.

⁴A rapaza prudente é un tesouro para o seu marido, a rapaza lercha dá mágoa a quen a xerou.

⁵A desvergonzada afronta ó pai e ó marido; ámbolos dous a refugan.

⁶Botar un sermón a destempo é coma levar música a un velorio; corrixir co fungueiro sempre foi boa sabedoría.

⁹Ponse a pegar rachas quen instrúe a un necio; é coma espreguizar a un durmiñón dun sono profundo.

¹⁰Tanto ten darlle razóns a un necio e darllas a un somnámbulo, ó remate dirá: —"que pasou?".

¹¹Chora por un morto: perdeu a luz; chora por un necio: perdeu o siso. Non chores tanto polo morto: xa acouga; mais a vida do necio é peor aínda cá morte.

¹²O dó por un morto dura sete días o do necio e do impío dura toda a súa vida.

¹³Co necio non fales moito nin camiñes co parvo, gárdate del para non ter molestias para non te lixar cando esbardalle; evítao e terás acougo e non te importunará coa súa teima.

¹⁴Que hai máis pesado có chumbo? Como se chama? —O necio.

¹⁵A area, o sal, unha masa de ferro, son máis doados de aturar ca un home sen siso.

¹⁶Entaboado de madeira encaixado no edificio non se descompón co terremoto. Do mesmo xeito, unha actitude afincada nun plan ben madurado non se conmove co perigo.

¹⁷Actitude afincada no cavilar argucioso é coma adorno de pasta na parede de perpiaño.

¹⁸Seixos pequenos por riba do muro non resisten ó vento; mente timorata ante proposta tola non resistirá ó medo.

¹⁹Quen fere nun ollo arrinca bágoas, quen fere no corazón fai xurdir o sentimento.

²⁰Quen tira pedras ós paxaros fainos fuxir, quen aldraxa a un amigo destrúe a amizade.

²¹Por máis que teñas desenvaiñado a espada contra un amigo, non desesperes; aínda hai retorno.

²²Por máis que teñas berrado cun amigo non teñas medo; podédesvos compor. Mais a aldraxe, o desprezo, o contar un segredo e ferir a traición: iso é o que fai fuxir a un amigo calquera.

²³Acada creto ante o teu veciño namentres é pobre; cando lle vaia ben tamén ti medrarás. Mantente a carón del nos momentos difíciles para teres parte con el na súa herdanza.

²⁴Na lareira, vapor e fume preceden ó sangue.

²⁵Non me avergonzarei de protexer a un amigo nin fuxirei de encontralo.

²⁶Se por culpa del me viñese algún mal, quen o saiba xa se gardará del.

²⁷Quen porá garda na miña boca e nos meus labios o selo da prudencia para non caer por causa deles e para que a lingua non me bote a perder?