Read Biblia SEPT Eclesiástico 24 Bible Online

Eclesiástico 24 - Biblia SEPT bible

Eclesiástico 24

¹A Sabedoría fai a propia loanza e gábase no medio do seu pobo;

²Abre a boca na asemblea do Altísimo, proclama a súa gloria diante do seu exército:

³—"Eu saín da boca do Altísimo e recubrín a terra coma a néboa;

⁴plantei a miña tenda no máis alto e pousei o meu trono nunha columna de nubes.

⁵Eu soa rodeei o cerco dos ceos e dei unha volta polo fondo dos abismos;

⁶tiven poder sobre as ondas do mar, sobre toda a terra e en todo pobo e nación.

⁷Entre todos eles procurábame acougo e a herdanza en que afincas a miña morada;

⁸foi entón cando o creador universal me ordenou e o que me formou fíxome plantar a tenda dicíndome: Afinca en Xacob, colle por herdanza a Israel.

⁹Antes dos séculos, desde o comezo, creoume e endexamais non deixarei de existir;

¹⁰oficiei na súa tenda santa, diante del, e deste modo estableceume en Sión;

¹¹do mesmo xeito, fíxome acougar na súa cidade amada, Xerusalén, onde goberno.

¹²Botei raiceiras nun pobo de moita sona e teño a miña herdanza na parcela do Señor.

¹³Medrei coma o cedro no Líbano e coma o ciprés nos montes do Hermón;

¹⁴crecín coma a palmeira en Engadí e coma a roseira en Xericó, coma a oliveira lanzal na chaira, e medrei coma o plátano.

¹⁵Espallei un recendo coma o da canela e a lavanda ou coma o da mirra refinada, coma o gálbano, o ónix e o estacte e coma a nube de incenso na tenda;

¹⁶Alonguei as miñas pólas coma o terebinto e os meus ramos son maxestosos e belidos;

¹⁷coma unha vide agromei xeitosa, as miñas flores dan froito abondo e sazonado.

¹⁹Vinde onda min os que me arelades e enchédevos dos meus froitos,

²⁰pois a miña lembranza é máis doce có mel e a miña herdanza máis doce có favo.

²¹Os que me coman aínda han ter fame; e os que me beban aínda han ter sede;

²²quen me obedeza non terá que avergonzarse e os que fagan as miñas obras non pecarán".

²³Isto todo non é mais có libro da alianza do Deus Altísimo, a lei que Moisés nos promulgou coma herdanza para as asembleas de Xacob.

²⁵Coma o Pisón, vai chea de Sabedoría, ou coma o Tigris no tempo da enchente;

²⁶énchese de intelixencia coma o Éufrates, coma o Xordán nos días da seitura;

²⁷coma o Nilo burbulla a instrución, coma o Guihón no tempo da vendima.

²⁸O primeiro aínda non a deu sabida, tampouco o derradeiro non chegará a pescudala,

²⁹pois o seu pensamento é máis amplo có mar e o seu consello meirande có océano.

³⁰Eu tamén xurdín coma regueiro de río ou coma unha canle que vai dar nun xardín,

³¹dicindo para min: —"Regarei a miña leira, alagarei o meu horto"; mais velaquí: o meu regueiro volveuse río e o meu río trocouse nun mar.

³²Aínda farei brillar a ilustración coma o abrente, fareina relucir ben lonxe.

³³Aínda hei de espallar a miña doutrina coma unha profecía, deixareina para as xeracións vindeiras.

³⁴Decatádevos de que non traballei só para min senón tamén para todos os que a procuran.