Read Biblia SEPT Eclesiástico 25 Bible Online

Eclesiástico 25 - Biblia SEPT bible

Eclesiástico 25

¹Con tres cousas relouca o meu espírito, cousas ben vistas do Señor e dos homes: concordia entre irmáns, amizade co veciño, muller e home que se levan ben.

²E tres castes de xente aborrece o meu espírito sen que ature o seu xeito de vida: o pobre orgulloso, o rico falso, o vello godallo e sen siso.

³O que non amoreaches na mocidade como o queres atopar na ancianidade?

⁴Que ben di coas canas o bo tino e cos anciáns o saber dar consello!

⁵Que ben vai a sabedoría nos anciáns e o matinar ponderado nos homes venerables!

⁶A moita experiencia é coroa dos anciáns, e o seu orgullo está no temor do Señor.

⁷Véñenme á mente nove cousas felices ó meu ver e coa lingua vou proclamar a décima: Benia o home que goza de seus fillos e quen vive para ver a desfeita dos seus inimigos.

⁸Benia o casado con muller prudente e quen non ten que arar cun boi xunguido co burro. Benia quen non esvara coa lingua e quen non ten que servir a un inferior.

⁹Benia quen atopa persoa comprensiva e quen fala a oídos que escoitan.

¹⁰E que grande é o que atinxe a Sabedoría! Mais non é meirande có que teme ó Señor.

¹¹O temor do Señor sobreponse a todo; con quen comparar a quen o acada?

¹³De feridas, calquera menos a do corazón; de maldade, calquera menos a de muller;

¹⁴de agresións, calquera menos a dos que odian; de vinganzas, calquera menos a dos inimigos.

¹⁵Non hai pezoña peor cá da serpente nin carraxe peor cá da muller.

¹⁶Prefiro convivir con león ou dragón a ter que habitar con muller perversa.

¹⁷A rabia da muller múdalle a cara, ponlle a faciana escura coma un oso,

¹⁸cando o marido senta cos amigos, mal que lle pese fóxenlle os salaios.

¹⁹Toda maldade é pouca en comparanza coa da muller, cáialle enriba a sorte do pecador!

²⁰Costa areosa para andar de vello é a muller lingoreteira para un home quedo.

²¹Non te enguedelles en fermosura de muller nin deas en arelar a súa facenda

²²pois é unha escravitude e unha vergonza que unha muller manteña ó seu marido.

²³Animo coitado, faciana tristeira, corazón ferido: muller perversa; brazos cangados, xeonllos frouxos: muller que non fai feliz ó marido.

²⁴Por unha muller comezou o pecado e por culpa dela todos morremos.

²⁵Non deas paso á auga nin deixes falar libremente á muller ruín;

²⁶se non se somete, corta en seco e bótaa lonxe de ti.