Read Biblia SEPT Eclesiástico 26 Bible Online

Eclesiástico 26 - Biblia SEPT bible

Eclesiástico 26

¹Benia o marido de muller xeitosa: vive días dobrados.

²A muller de valer engorda ó marido: anos que viva, sempre andará ledo.

³Muller boa, boa partilla: tócalle en sorte a quen teme ó Señor;

⁴sexa rico ou pobre sempre dá bo tempo e en todo momento pon cara riseira.

⁵Tres cousas fanme tremer o ánimo e unha cuarta arrepíame: calumnia de vila, xuntanza de turba, falsa testemuña: todo peor cá morte.

⁶Dor de corazón e pranto é a muller que se cela doutra; e a tralla da lingua ten que ver con isto todo.

⁷Muller perversa é coma un xugo frouxo e quen a aferra pilla un alacrán;

⁸grande noxo dá a muller bébeda, non lle será doado agachar o seu baldón.

⁹A imprudencia da muller nótaselle no ollar descarado, coñéceselle ben no pestanexar.

¹⁰Diante dunha moza lercha reforza a garda, non sexa que vendo debilidade se aproveite.

¹¹Garda ben os ollos ante unha descarada, non te estrañes se despois che falta,

¹²pois abre a boca coma viaxeiro sedento e bebe da primeira auga que atopa; senta diante de calquera esteo e a calquera frecha abre a súa alxaba.

¹³O engado da esposa aleda ó marido e o seu siso refórzalle os ósos.

¹⁴Don do Señor é a muller calada e non ten prezo a ben educada.

¹⁵Graza sobre graza, a muller recatada, nin se paga con nada a que se contén.

¹⁶Coma raiola o sol por riba dos cumios así a beleza da muller na casa ben gobernada.

¹⁷Candea que aluma no santo lampadario é unha cara belida sobre un corpo xeitoso.

¹⁸Columnas de ouro baseadas en prata son as pernas lanzais sobre pés ben plantados.

¹⁹Filliño, conserva a flor da túa mocidade e non deas a mulleres alleas o teu vigor.

²⁰Despois de procurarte a leira máis fértil da bisbarra, sementa a túa semente afiunzando na túa caste.

²¹Deste xeito os xermolos que te sucedan medrarán orgullosos da súa liñaxe.

²²Muller a prezo non vale un farrapo, a casada é cadea perpetua para os que gozan dela.

²³Muller impía, tóquelle en sorte ó pecador; a piadosa dáselle a quen teme ó Señor.

²⁴Muller sen vergonza practica o máis infame, moza recatada mesmo co marido é delicada.

²⁵A muller impúdica será tratada coma unha cadela, a pudorosa temerá ó Señor.

²⁶Muller que honra ó marido, a todos lles parece sabia; á que o despreza por soberbia, todos a terán por impia. Benia ó marido de muller xeitosa: o número dos seus anos será dobrado;

²⁷Muller chiona e lingoreteira é trompeta de guerra que anuncia unha carga; quenquera que se encontre en tales condicións pasará a vida entre liortas.

²⁸Dúas cousas énchenme o ánimo de tristura e unha terceira de carraxe: o paladín impedido pola pobreza, o desprezo de homes intelixentes, e o que vira da virtude ó pecado; o Señor resérvalle a espada.

²⁹Dificilmente se libra de culpa o negociante nin o tratante fica libre de pecado.