Read Biblia SEPT Eclesiástico 27 Bible Online

Eclesiástico 27 - Biblia SEPT bible

Eclesiástico 27

¹Moitos pecaron por culpa da ganancia e quen procura encherse desvía os ollos.

²Entre a xuntura das pedras afíncase unha estaca, entre a venda e a compra cóase o pecado.

³A quen non é firme no temor do Señor, ben axiña se lle derrubará o casal.

⁴Tralo abaneo da peneira, queda o farelo; tamén queda o refugallo do home cando o examinan.

⁵As potas do oleiro saen segundo arda o forno, un home é o que é segundo o que pensa.

⁶Conforme o que se coide unha árbore serán os seus froitos, e o raciocinio segundo a inclinación que un teña.

⁷Non loes a ninguén antes de que razoe pois tal é a proba dos homes.

⁸Se persegues a rectitude, acadarala e levarala vestida coma túnica de gloria.

⁹Os paxaros pousan xunto cos da súa especie e a verdade achégase ós que a practican.

¹⁰O león axexa a presa e o pecado ós que cometen inxustizas.

¹¹A conversa do home relixioso é sempre sabia, o necio cambia coma a lúa.

¹²Demora o momento de ires cos insensatos, cos intelixentes alonga a morada.

¹³A conversa dos parvos é molesta, as súas risadas deléitanse no pecado.

¹⁴A linguaxe do xurafaz dá arrepío, cando rifa tes que pechar os oídos.

¹⁵Liorta de fachendosos, derramo de sangue: dá noxo escoitar as súas inxurias.

¹⁶Quen descobre un segredo perde o creto, non atopará amigo ó seu gusto;

¹⁷gaña un amigo e afiúza nel, mais se descobres o seu segredo, non corras tras el,

¹⁸pois coma quen botou a perder a herdanza botaches ti a perder a amizade do teu amigo;

¹⁹como se deixases fuxir da man un paxariño; ó deixares irse o amigo, xa non o recuperarás.

²⁰Non intentes seguilo, xa vai lonxe, escapou coma a gacela do lazo.

²¹É doado enfaixar unha ferida e reconciliar tras unha liorta, mais para quen descobre un segredo, finou a esperanza.

²²Quen chisca o ollo, traza cousa mala, o que se decata diso afastarase del;

²³diante de ti adozará a súa boca marabillándose das túas razóns; despois muda a linguaxe e dálles ás túas verbas un senso escandaloso.

²⁴Moitas cousas aborrezo, mais ningunha coma esta; tamén o Señor o refuga e o maldí.

²⁵Quen tira a pedra ó alto, cáelle na cabeza, quen bate a traizón leva parte nas feridas.

²⁶Quen cava a cova irá a dar nela, quen tende unha rede enredarase nela;

²⁷A quen fai o mal háselle volver contra el e non saberá de onde lle veu.

²⁸Escarnio e aldraxe son cousas do soberbio mais a vinganza ándalle á espreita coma un león.

²⁹Os que gozan coa caída dos piadosos serán pillados na trampa, a dor faralles compaña ata a morte.

³⁰Xenreira e asañamento son de aborrecer; o pecador é quen os posúe.