Read Biblia SEPT Eclesiástico 28 Bible Online

Eclesiástico 28 - Biblia SEPT bible

Eclesiástico 28

¹Quen fai vinganza atoparase coa vinganza do Señor, pediralle razón estreita dos seus pecados.

²Perdóalle a inxuria ó teu próximo e entón ó pregares seranche perdoados os teus pecados.

³Home que lle garda a outro xenreira, como lle vai pedir ó Señor que o cure?

⁴De alguén que é coma el non se apiada, e vai rogar polos seus pecados?

⁵Se el, que é carne, mantén a ira, quen lle vai expiar as súas culpas?

⁶Pensa na fin e deixa de asañarte, recorda a corrupción e a morte e cumpre os mandamentos.

⁷Lembra os mandamentos e non rifes co próximo, recorda a alianza co Altísimo e non deas valor á falta.

⁸Tente lonxe das rifas e minguarás os pecados pois é o home iracundo quen acende as liortas

⁹e o home pecadento quen perturba ós amigos metendo a disputa entre os que se levan ben.

¹⁰Segundo sexa a leña, alampa máis o lume; segundo sexa a teimosía, agrándase a loita. Conforme sexa a forza dun home, tanto máis se alporiza, conforme sexa un rico, tanto máis se enrabecha.

¹¹Faísca súbita acende o lume, liorta precipitada derrama o sangue.

¹²Sopras na muxica e alampa, cóspeslle enriba e apágase, e ámbalas dúas cousas saen da túa boca.

¹³Malia o murmurador e o de lingua dobrada: ten estragado moita xente de paz.

¹⁴Lingua de terceiros exiliou a moitos facéndoos pasar de nación en nación, derrubou cidades fortificadas, arruinou pazos principescos.

¹⁵Lingua de terceiros fixo repudiar mulleres de valía privándoas do froito dos seus traballos;

¹⁶quen lle presta oídos non terá máis acougo e xa non morará en paz.

¹⁷Un traballo deixa negróns, a zoupada da lingua quebra os ósos.

¹⁸Moita xente morreu a fío de espada, mais non tantos como pola lingua;

¹⁹feliz quen se furta dela, a quen non alcanza o seu furor, quen non tira do seu xugo nin vai atado coas súas cadeas;

²⁰pois o seu xugo é de ferro e as súas cadeas de bronce.

²¹Duro é morrer por culpa dela, mellor ca ela é o Hades.

²²Sobre os piadosos, con todo, non ten poder, non se queimarán na súa labarada;

²³caerán nela os que se afastan do Señor, consumiraos sen esmorecer; chimparase sobre eles coma un león. esfaragullaraos coma unha pantera.

²⁴Mira: cingue a túa leira con sebe de toxos encerra ben a túa prata e o teu ouro

²⁵e ponlles ás túas verbas balanza e mais pesas, e pecha a túa boca con porta e ferrollo.

²⁶Coida de non dares con ela un mal paso, non vaias caer diante de quen te axexa.