Read Biblia SEPT Eclesiástico 3 Bible Online

Eclesiástico 3 - Biblia SEPT bible

Eclesiástico 3

¹Escoitade, fillos, a corrección paterna e obrade de xeito que vos salvedes;

²pois o Señor honrou ó pai máis cós fillos e afincou o dereito da nai sobre o dos nenos.

³Quen honra a seu pai redime as culpas.

⁴Quen enxalza a súa nai é coma quen atesoura.

⁵Quen honra a seu pai gozará dos fillos e cando vaia pregar será atendido.

⁶O que respecta ó pai terá vida longa e quen obedece ó Señor daralle consolo a súa nai

⁷e servirá coma a amos a aqueles que o xeraron.

⁸Meu fillo, honra a teu pai de palabra e de obra para que veña sobre ti toda clase de bendicións.

⁹A bendición dun pai fai botar raigaños, a maldición dunha nai arrinca a planta.

¹⁰Non te gloríes coa deshonra de teu pai pois non é para ti un motivo de honor.

¹¹A un home vénlle honor da honra de seu pai mais quen maldí de súa nai fai un grave pecado.

¹²Meu fillo, persevera no honrar a teu pai, non o desatendas nos días da túa vida.

¹³Aínda que perda o xuízo, tenlle miramento e non o aldraxes todo o tempo que viva.

¹⁴O ben que se lle faga a un pai non será borrado, hache valer coma compensación do pecado;

¹⁵no día da proba teráseche en conta; coma coa calor a xeada esluiranse as túas culpas.

¹⁶É coma un blasfemo quen avergonza a seu pai e provoca ó seu creador quen maldí de súa nai.

¹⁷Meu fillo, cando sexas rico procede modestamente e virás a ser máis amado có que fai moitos agasallos;

¹⁸faite pequeno diante das grandezas do mundo e encontrarás favor onda Deus;

¹⁹pois grande é a misericordia de Deus que revela os seus segredos ós humildes.

²¹Non vaias á procura do difícil de máis para ti nin pescudes o que te supera;

²²dedica a túa reflexión ó que está no teu poder e non te ocupes do profundo e escondido.

²³Non te afanes no que te supera pois amosáronseche cousas que non podes comprender.

²⁴Certamente moitas son as teimas dos humanos mais as matinacións perversas desvarían.

²⁵Sen pupila falta a luz e onde falta o coñecemento non hai Sabedoría.

²⁶Mente teimuda terá mal final e quen ama os praceres neles será alindado.

²⁷Mente teimuda multiplica as súas coitas, quen se atormenta engade culpa á culpa.

²⁸Non corras a sandar a ferida do burlón; non ten cura pois é grelo de planta cativa.

²⁹A mente sabia comprende os ditos dos Sabios, o oído atento á Sabedoría aledarase.

³⁰Coma a auga mata o lume flamante, a esmola encobre os pecados.

³¹Quen fai o ben, atópao nos seus camiños, cando tropece encontrará un acougo.