Read Biblia SEPT Eclesiástico 32 Bible Online

Eclesiástico 32 - Biblia SEPT bible

Eclesiástico 32

¹Se te invitan á presidencia non te enfonches coma un deles, ocúpate dos outros, despois ponte á mesa.

²Atende ó que lles cómpre, só despois déitate no diván para te deleitares cos seus honores e amosares bo tino coa túa compostura.

³Se es un ancián, fala cando che toque, agudo nas razóns, e non impidas o canto.

⁴Cando cheguen os brindes non prolongues o discurso e aínda que non haxa música non presumas de sabio a contratempo.

⁵Broche de rubí engastado en ouro é un cantar ben acordado nun banquete con viño.

⁶Colar de ouro con pedra de zafiro é o son do cantar despois dun licor agradable.

⁷Se es rapaz novo, fala se é necesario despois de seres invitado con insistencia dúas ou tres veces.

⁸Serás breve: di moito en poucas verbas; fai impresión de que, ben informado, sabes calar.

⁹Non interveñas cando falen os anciáns nin te prodigues en explicacións cos magnates.

¹⁰Antes da sarabia brilla o lóstrego, por diante do modesto fulxe o seu engado.

¹¹No intre de partires non te demores, volta para a túa casa e fai alí o que che pete.

¹²Di entón o que che veña en mente mais con temor de Deus e non sen siso;

¹³e, por riba de todo, dá grazas ó creador que te fartou con tantas cousas boas.

¹⁴Quen consulta a Deus aprende a disciplina, quen por El se ergue cedo atopará resposta.

¹⁵Quen pescuda na Lei tirará dela froito mais quen a toma a xogo enrédase nela.

¹⁶Quen teme ó Señor aprenderá o dereito, do seu interior tirará as decisións axeitadas.

¹⁷O home argucioso desvía as refutacións e retorce a Lei conforme ó gusto seu.

¹⁸Un home sabio non agacha o seu saber coma tampouco o insolente garda a lingua.

¹⁹Nada fagas sen aconselláreste para non teres que te arrepentir despois do feito.

²⁰Non vaias por camiño cheo de trampas nin batas por dúas veces nun tropezo.

²¹Non vaias confiado por camiño de bandoleiros e garda as costas.

²²En todas as accións vixíate a ti mesmo; quen obra dese xeito garda a Lei.

²³Quen cumpre coa Lei, a si mesmo se garda; e quen afiúza no Señor non será confundido.