Read Biblia SEPT Eclesiástico 33 Bible Online

Eclesiástico 33 - Biblia SEPT bible

Eclesiástico 33

¹A quen teme ó Señor non lle sucede mal ningún pois aínda da tentación sairá salvo.

²Non chega a sabio quen refuga a Lei, será abaneado coma a dorna na galerna.

³Un home asisado comprende a palabra do Señor, o seu ensino é seguro coma os Urim.

⁴Prepara a túa razón e despois pasa ás obras, pensa con calma, despois discutirás.

⁵Coma a roda do carro é a mente do parvo e coma o eixo a xirar, os seus pensamentos.

⁶Coma cabalo en celo é o amigo molesto, monte quen o monte, rincha.

⁷Por que un día non é coma o outro se todo o ano lles vén a luz do sol?

⁸—A Sabedoría do Señor fíxoos distintos de xeito que houbese días de festa;

⁹Algúns de entre eles bendiciunos santificándoos e ós outros fíxoos días correntes.

¹⁰Tamén os homes todos están feitos de arxila —pois de terra foi formado Adam—

¹¹mais a Sabedoría do Señor distinguiunos e diferenciou os seus camiños:

¹²bendí e honra a algúns, a outros santifícaos e dedícaos a si; a algúns deles maldíos e humíllaos e guíndaos fóra dos seus postos.

¹³Coma a arxila na man do oleiro, que a manexa ó seu gusto, así o home está nas mans do seu creador que lle fixa un papel na súa presenza.

¹⁴De fronte ó mal, o ben; de fronte á vida, a morte; de fronte ó bo, o malvado; de fronte á luz, a tebra.

¹⁵Considérate de todas as obras de Deus, todas elas feitas por parellas e unha oposta á outra.

¹⁶Tocante a min, eu cheguei derradeiro, coma quen rebusca despois dos que vendiman,

¹⁷mais pola graza de Deus saín avantaxado e coma vendimador enchín o meu lagar.

¹⁸Considerade que non traballei para min só senón tamén para quenquera que procura Sabedoría.

¹⁹Escoitádeme, gobernantes dun gran pobo, prestade oídos, os presidentes da asemblea. Testamentos, ó seu tempo

²⁰A fillo ou a esposa, a amigo e veciño, non deas poder ningún mentres ti vivas.

²¹Mentres esteas en vida e teñas folgos non te deixes dominar de ninguén.

²²Mellor é que os teus fillos che pidan que estar ti dependendo deles.

²³Serás ti quen decida en todos os teus negocios sen botares chatas na túa dignidade.

²⁴Cando remate a conta dos teus curtos días, estando para morrer, distribúe a herdanza.

²⁵O burro, penso, tralla e carga; ó criado, mantenza e traballo arreo.

²⁶Atarefa ó criado para que non busque vagar, como erga a cabeza háseche revirar.

²⁸Fai traballar ó criado para que non se subleve

²⁹pois o vagar carrexa moitos males.

³⁰A criado torcido, moitas cadeas, mais non te pases con ninguén nin fagas nada sen xustiza.

³¹Tes soamente un criado? —Que sexa coma ti, pois cando esteas feble terás necesidade del; tes soamente un criado?— Trátao coma irmán, non teñas celos do teu propio sangue.

³²Se o asoballas fuxirá, e pérdelo, por que camiño habías de atopalo?