Read Biblia SEPT Eclesiástico 34 Bible Online

Eclesiástico 34 - Biblia SEPT bible

Eclesiástico 34

¹Quen procura a vaidade atopa o erro e os soños dan azos ós parvos.

²Apreixa sombras e persegue vento quen lles dá creto ós soños.

³O soño é coma un espello: reflicte o rostro, unha imaxe do rostro.

⁴Que pode haber de limpo no lixado? Que pode haber de verdade na mentira?

⁵Adiviñacións, agoiros e soños son cousas vas: andrómenas de mente parturiente.

⁶Se non foron enviados polo Altísimo nunha visión, non acredites neles.

⁷Os soños teñen feito errar a moitos, e afiuzando neles, pereceron.

⁸A Lei, en troques, cúmprese sen falsidade, e a Sabedoría é íntegra cando a boca é veraz.

⁹Quen teña viaxado coñece moitas cousas, quen ten moita experiencia fala asisadamente.

¹⁰Quen non pasou por probas, pouco coñece; mais o que viaxou abunda en mañas.

¹¹Moito teño eu ollado nas miñas viaxes, tenme pasado máis dunha aventura.

¹²En perigo de morte atopeime a miúdo e salveime grazas ó feito seguinte:

¹³que o espírito dos que temen a Deus mantense en vida pois a súa esperanza afinca no que os salva.

¹⁴Quen teme ó Señor non ten medo de nada nin perde azos pois pon nel a súa esperanza.

¹⁵Feliz o espírito de quen teme ó Señor: en quen afinca? quen é o seu alicerce?

¹⁶Os ollos do Señor pousan naqueles que o aman como potente escudo e rexo apoio, reparo na calor e sombra ó mediodía, defensa de tropezos e axuda contra os tombos,

¹⁷erguendo o ánimo e alumando os ollos, dando a saúde, a vida e bendición.

¹⁸Sacrificar un ben mal adquirido é unha ofrenda impura e os dons da xente sen lei non son aceptados.

¹⁹Non acolle o Altísimo donativos de impíos nin lles perdoa as culpas polas moitas oblatas.

²⁰Coma inmolar a un fillo na presenza do pai é ofrendar sacrificios cos bens dos pobres;

²¹dunha escasa mantenza depende a vida dos pobres, quen os priva dela é un asasino.

²²Mata ó seu próximo quen lle colle o sustento, esparexe sangue quen lle nega a paga ó obreiro.

²³Un a edificar e outro a demoler, que proveito tiran se non é máis traballo?

²⁴Un a bendicir e outro a maldicir, cal das dúas voces escoitará o Señor?

²⁵Quen se lava despois de tocar un cadáver e volve tocalo, de que lle vale o baño?

²⁶Do mesmo xeito, a quen xaxúa polos propios pecados e torna a facer o mesmo, quen lle vai acoller a súa pregaria e de que lle valeu mortificarse?