Read Biblia SEPT Eclesiástico 35 Bible Online

Eclesiástico 35 - Biblia SEPT bible

Eclesiástico 35

¹Aquel que observa a Lei fai ofrendas cumpridas,

²o que garda os mandamentos fai sacrificio de comuñón.

³Quen se amosa indulxente ofrece flor de fariña,

⁴e o que doa unha esmola fai sacrificio de loanza.

⁵Se afastarse do mal comprace ó Señor, fuxir da inxustiza é propiciación.

⁶Non te achegues ó Señor coas mans baleiras

⁷pois isto todo faise por mor do precepto.

⁸A ofrenda do xusto enche de graxa o altar, o seu recendo atingue ó Altísimo.

⁹O sacrificio do xusto é ben acollido, o seu memorial non será esquecido.

¹⁰Dá honor ó Señor con xenerosidade e non andes a relear coas primicias das túas mans.

¹¹En todo canto doares, pon rostro amable e consagra o teu décimo con ánimo ledo.

¹²Dálle a Deus segundo El che doou, con xenerosidade e conforme ós teus posibles,

¹³pois Deus recompensaracho devolvéndoche o séptuplo.

¹⁴Non lle vaias con subornos, que non os acepta, non poñas esperanza na ofrenda extorsionada,

¹⁵porque El é un Deus xusto e non ten preferencias de persoa;

¹⁶non tomará parte contra o pobre mais presta oídos ás demandas do asoballado,

¹⁷non refuga os saloucos do orfo nin da viúva que repite o seu laio

¹⁸en tanto lle esvaran as bágoas polas meixelas

¹⁹e salaia de fronte a aqueles que as fan correr.

²⁰Semellante laio acada o seu favor, o seu berro chega ata as nubes.

²¹O grito do pobre traspón as nubes, non pousa ata chegar á meta, non cede ata que Deus o atende e que o xuíz veraz faga xustiza;

²²tampouco Deus a retardará nin, coma baril, hase deter ata esfolar os lombos do cruel e cumprir vinganza nas nacións,

²³Ata eliminar o cetro orgulloso e esnaquizar o fungueiro impío;

²⁴Ata retribuír a cadaquén segundo as súas obras, e os feitos do home segundo as súas matinacións; Ata defender a causa do seu pobo aledándoo coa súa salvación. Apreciada é a súa misericordia no tempo da opresión coma a orballada no tempo da seca.