Read Biblia SEPT Eclesiástico 36 Bible Online

Eclesiástico 36 - Biblia SEPT bible

Eclesiástico 36

¹Sálvanos, Deus do universo,

²espalla o teu terror en todas as nacións;

³brande a túa man contra un pobo estranxeiro para que experimenten o teu poderío.

⁴Como te amosaches santo ós seus ollos a costa nosa, maniféstate glorioso á nosa vista en contra deles,

⁵para que aprendan, como fixemos nós, que non hai Deus fóra de ti.

⁶Renova os prodixios, repite os milagres,

⁷honra a túa man, fai forte o teu brazo dereito,

⁸excita a carraxe, esparexe a ira,

⁹humilla ó opresor arreda ó inimigo,

¹⁰Adianta o remate, ten en conta a data fixada pois quen poderá dicirche: —"Que fas?".

¹¹Arda no alampar da túa carraxe o que tentou fuxir e que os que asoballaron ó teu pobo vaian dar na ruína.

¹²Abate a cabeza dos príncipes de Moab, dos que din: —"Non hai coma min".

¹³Reúne a todas as tribos de Xacob e que reconquisten a herdanza coma nos vellos tempos.

¹⁴Ten piedade do pobo que leva o teu nome, de Israel a quen designaches primoxénito.

¹⁵Ten piedade da túa cidade santa, Xerusalén, lugar da túa morada.

¹⁶Enche Sión coa túa maxestade; e o teu templo, de gloria.

¹⁷Dá testemuño a prol da mellor das túas obras, cumpre a visión proclamada no teu nome.

¹⁸Recompensa ós que en ti esperan para que se lles dea creto ós teus profetas.

¹⁹Escoita a pregaria dos teus servos segundo o que te compraces no teu pobo; recoñezan todos os confíns da terra que ti es o Deus sempiterno.

²⁰A gorxa acepta un xantar calquera, por iso uns alimentos son máis saborosos ca outros.

²¹O padal distingue o sabor dunha cousa, a intelixencia capta o sabor da mentira.

²²Un corazón arteiro procura mágoas, o home asisado retórceas contra el.

²³A muller acolle ó marido que sexa, con todo unhas mozas valen máis cás outras.

²⁴A beleza da muller aleda o rostro e supera canto arela o ollo,

²⁵se por riba posúe unha doce fala o seu home xa non se conta entre os humanos.

²⁶Acadar muller é o sumo das ganancias, unha axuda, fortaleza e columna de apoio.

²⁷Onde non hai sebe estrágase a viña; onde falta a muller, ándase errante e ós tombos. Quen afiúza nunha banda armada que anda ás correrías de vila en vila? Pois tal é o home ó non ter niño, que pousa onde o pilla a noite.