Read Biblia SEPT Eclesiástico 37 Bible Online

Eclesiástico 37 - Biblia SEPT bible

Eclesiástico 37

¹Calquera amigo di: —"Téñoche boa lei", mais hainos só de nome.

²Non é por caso unha mágoa de morte que un amigo íntimo se volva inimigo?

³Ouh maligna tendencia! Para que fuches creada? Para encher a face da terra de engano.

⁴Amigo falso non quita ollo da mesa mais no tempo de estreituras mantense lonxe.

⁵Un bo amigo loita contra o adversario e apresta o escudo contra os agresores.

⁶Non esquezas o compañeiro na contenda nin lle roubes ó recoller a presa.

⁷Todo conselleiro fai indicacións mais hai conselleiros que suxiren para o seu proveito.

⁸Gárdate ben do conselleiro, considera de primeiras cal é o seu interese, pois tamén el está a pensar para si: "Por que habería este de tirar o proveito?"

⁹Non che vaia dicir: —"A túa idea é boa", e se poña á parte para contemplar a túa desfeita.

¹⁰Non te aconselles con quen te envexa, e esconde o teu plan de quen che ten celos:

¹¹Nin con muller verbo da súa rival, nin co adversario no tocante á guerra, nin co tratante no tocante á compra, nin co comprador no tocante á venda, nin co malicioso sobre unha boa acción, nin co cruel sobre o ser humano, nin co asalariado no tocante ó seu traballo, nin co que arrendou por un ano sobre o valor da colleita, nin co criado preguiceiro no tocante a un traballo duro. Non te apoies neles para proxecto ningún.

¹²Consúltate máis ben con quen é de sempre respectuoso, que coñeces coma observante da Lei, que teña o teu mesmo sentir e que en caso de tropezo, che acorra.

¹³Por riba diso, atende ás suxestións do teu corazón pois quen che vai ser fiel coma el?

¹⁴O corazón agóiralle ó home o momento oportuno mellor ca sete astrólogos na atalaia.

¹⁵E ademais disto, suplícalle a Deus para que afinque as túas pegadas na verdade.

¹⁶Comezo de toda acción é a palabra e comezo de toda tarefa, a reflexión;

¹⁷raiceira dos proxectos é a mente, e dela despuntan catro pólas:

¹⁸o ben e o mal, a vida e a morte; e a lingua domina totalmente sobre elas.

¹⁹Sabio hai que tal é para moita xente e consigo mesmo é un imbécil,

²⁰e sabio hai desprezado polo seu falar e excluído de todo banquete delicioso.

²²Sabio hai que o é para si e nótaselle no corpo o froito da súa ciencia;

²³e sabio hai que é sabio para o seu pobo e o froito da súa ciencia será perdurable.

²⁴Quen é sabio para si fártase de satisfaccións, os que o ven felicítano.

²⁵Quen é sabio para o pobo herdará gloria e a súa sona vivirá eternamente.

²⁶A vida dun home son días contados, a vida do pobo de Israel son días innumerables.

²⁷Meu fillo, mentres vivas controla a gorxa; observa o que lle fai mal, para refugalo,

²⁸pois non todo é bo para todos nin todo xantar lle vai ben a calquera.

²⁹Non devezas por toda lambetada nin te botes sobre calquera peperete

³⁰pois nas moitas lambetadas aniña a enfermidade e a inmoderación provoca a náusea.

³¹Moitos morreron por intemperanza, mais o que se controla alonga a vida.