Read Biblia SEPT Eclesiástico 39 Bible Online

Eclesiástico 39 - Biblia SEPT bible

Eclesiástico 39

¹Aquel, en troques, que aplica o seu espírito a cavilar na Lei do Altísimo, esculca na Sabedoría dos devanceiros, dá tempo ó estudio das profecías,

²pescuda as disertacións de homes famosos e penetra nas dificultades das sentencias;

³inquire o senso oculto dos proverbios, cóllelles as voltas ós enigmas das parábolas.

⁴Presta servizo ante os grandes, comparece ante os príncipes; viaxa por nacións estranxeiras experimentando o que hai de bo e de malo entre os homes.

⁵Desde o amencer diríxese con todo o seu ánimo ó Señor que o creou e suplica na presenza do Altísimo; abre a boca cunha pregaria e roga perdón polos pecados.

⁶Se o grande Señor quixese, será colmado dun espírito intelixente; faralle orballar verbas sabias de xeito que confese ó Señor na súa pregaria;

⁷dirixiralle o querer e o saber para que abonde nos seus segredos;

⁸revelaralle a doutrina do seu ensino para que teña o seu orgullo na Lei da alianza do Señor.

⁹Moitos loarán a súa perspicacia que non será endexamais esquecida; non perecerá o seu recordo e a súa sona manterase viva por xeracións.

¹⁰Comentarán as nacións a súa Sabedoría e a asemblea proclamará a súa loanza.

¹¹En canto viva será máis famoso ca moitos miles, cando morra abondaralle co seu nome.

¹²Vou aínda proseguir as miñas reflexións pois estou delas cheo coma o luar a mes mediado:

¹³escoitádeme, fillos piadosos, e agromaredes coma a roseira plantada á beira da corrente;

¹⁴recenderedes coma o incenso, floreceredes coma o lirio. Erguede a voz loando a coro e celebrade ó Señor por todas as súas obras,

¹⁵engrandecede o seu nome, proclamade a súa loanza ó son da cítola e toda clase de cántiga, dicindo deste xeito, aclamando:

¹⁶As obras de Deus son todas boas, todo canto cómpre dispono El ó seu tempo.

¹⁷A súa voz detense a auga e embólsase, xorde da súa cámara co mandado da súa boca;

¹⁸o seu parecer realízase de súpeto, ninguén pode deter o seu triunfo;

¹⁹sonlle patentes as obras de todo vivente, nada se esconde ós seus ollos;

²⁰olla da eternidade á eternidade, nada hai extraordinario para el.

²¹Non se pode dicir: —"Isto para que vale?" pois cada cousa foi escolleita para o seu fin; nin é doado dicir: —"Isto é peor ca aquilo" pois cada cousa ten valor no seu tempo.

²²A súa bendición reborda coma o Nilo, coma o Éufrates alaga o universo;

²³tamén a súa carraxe espolia as nacións e troca en estepa de sal campías de rego.

²⁴Os seus vieiros son terreo chan para os íntegros, por contra son fragosos para os impíos.

²⁵Desde o comezo fixo os bens para os bos e para os malvados, bens e males.

²⁶De primeira necesidade para unha vida humana, son: auga e lume, ferro e sal, a flor do trigo, o leite, o mel, zume de uva, aceite e vestido;

²⁷isto todo é de proveito para os bos mais para os malvados trócase en mal.

²⁸Existen ventos creados para a vinganza que na súa carraxe arrincan as montañas; no tempo da ira amosan a súa forza amainando a xenreira do seu creador;

²⁹lume e sarabia, fame e peste tamén foron creados para o castigo;

³⁰bestas feras, alacrán e víbora, e a espada vingadora, para a extinción de impíos. Cada un deles foron creados para o seu propósito e esperan no celeiro o seu tempo oportuno;

³¹cando lles dá un mandado alédanse, non se reviran contra os seus decretos.

³²Velaquí o que desde o comezo intentei cavilar, o que examinei e deixei por escrito:

³³—"Todas as obras de Deus son boas, todo canto cómpre, dispono El ó seu tempo".

³⁴Non se pode dicir: —"Isto é peor ca aquilo" pois cada cousa ten valor no seu momento.

³⁵Aledádevos, logo, de todo corazón e bendicide o nome do Santo.