Read Biblia SEPT Eclesiástico 4 Bible Online

Eclesiástico 4 - Biblia SEPT bible

Eclesiástico 4

¹Filliño, non te burles da vida do coitado nin entristezas a quen sofre mágoas;

²non deixes que xema o necesitado nin te escondas dos deprimidos.

³Non conturbes as entrañas do asoballado nin causes mágoa no interior do miserento; non negues unha dádiva ós mendigos.

⁴Non refugues as demandas do pobre,

⁵non lle deas motivo de te maldicir

⁶pois queixaríase co corazón amargado da dor e a súa Rocha escoitaría o son do seu laio.

⁷Fai que te queiran ben na comunidade e abaixa a cabeza diante do maxistrado.

⁸Párate a escoitar ó pobre e devólvelle con modestia o saúdo.

⁹Ceiba ó asoballado do seu opresor e non teñas reparo en defender unha causa xusta.

¹⁰Serás coma un pai para os orfos, fai as veces de marido para as viúvas; daquela Deus hate chamar fillo, seraslle grato e ceibarate da cova.

¹¹A Sabedoría instrúe ós seus fillos e exhorta ós que a estudan.

¹²Os que a aman, aman a vida, os que a procuran, acadan beneplácito de Iavé.

¹³Os que a acaden, encontrarán gloria, farán morada na bendición de Iavé.

¹⁴Dan culto ó Santo os que a serven, Deus en persoa ama ós que a aman.

¹⁵Quen me escoita, vive seguro; quen me preste atención morará nas miñas cámaras.

¹⁶Se afiúza en min, terame en herdanza e a súa descendencia conservará a miña posesión,

¹⁷pois disfrazada, camiñarei ó seu carón: de primeiras probareino con tentacións, infundireille terror e medo, e en tanto o seu corazón non se encha de min poreino a proba cos meus exames;

¹⁸volverei entón a conducilo e revelareille os meus segredos.

¹⁹Mais se se afasta refugareino, e entregareino ás cadeas.

²⁰Meu fillo, no tempo da fartura, gárdate con temor do mal para non ter que te avergonzares de ti mesmo

²¹pois hai vergonza que leva aparellada a culpa, como outra vergonza carrexa boa sona e favor.

²²Non andes con miramentos que te prexudiquen e non te rebaixes ante quen te quere humillar.

²³Non conteñas unha palabra ó seu tempo nin agaches a túa sabedoría,

²⁴pois falando dáse a coñecer a Sabedoría e o discernimento na resposta da lingua.

²⁵Non lle leves a contra a Deus; sométete a Deus.

²⁶Non te avergonces de te converter da culpa: non fagas fronte á corrente.

²⁷Non te sometas ó mal asisado nin te revires contra os que gobernan.

²⁸Loita ata a morte pola xustiza e Iavé combaterá do teu lado.

²⁹Non sexas de lingua fachendosa nin frouxo nin remiso nos teus feitos;

³⁰non sexas coma un león no teu casal mais tampouco afastado e tímido cos teus criados.

³¹Que a túa man non estea aberta para recibir e pechada cando se trata de dar.