Read Biblia SEPT Eclesiástico 41 Bible Online

Eclesiástico 41 - Biblia SEPT bible

Eclesiástico 41

¹Oh morte, que aceda é a túa lembranza para quen mora quedo nos seus eidos, para quen vive en paz e todo lle vai ben e aínda ten folgos para gozar de pracer!

²Oh morte, que bo é o teu decreto para o home mísero e falto de vigor, para quen tropeza e se ve atrapado por todas partes, para quen abanea e perdeu a esperanza!

³Non teñas medo do teu destino mortal, lembra que o mesmo vale para os que te precederon e te sigan.

⁴É a sorte que Deus impuxo a todo vivente, como vas refugar a Lei do Altísimo? Vivas mil, cen ou dez anos, non se protesta no Xeol polo que dura a vida.

⁵Descendencia desbotada é a dos malvados que van a miúdo á casa dos impíos.

⁶Arrincaranlle o poderío ó fillo do perverso e a aldraxe acompañará á súa prole.

⁷A un pai malvado maldío seu fillo pois por culpa del sofre a deshonra.

⁸Ai de vós, impíos, que abandonades a Lei do Altísimo!

⁹Se vos multiplicades será para a desventura, se xerades será para a coita, ó caerdes haberá escarnio permanente, cando morrades será na maldición.

¹⁰Canto vén da nada volve á nada, así o impío: do baleiro ó baleiro.

¹¹Un home no seu corpo é un sopro, mais o nome do piadoso non perece.

¹²Coida do teu bo nome pois hache valer máis do que un milleiro de tesouros prezados.

¹³A ledicia de vivir dura días contados; a boa sona, anos sen fin.

¹⁴Sabedoría agachada e tesouro oculto de que serven ámbolos dous?

¹⁵Máis vale quen agacha a súa tolemia có que esconde a súa sabedoría.

¹⁶Filliños, escoitade a instrución sobre a vergonza e confundídevos seguindo o meu xuízo; pois non é valiosa unha vergonza calquera nin é aceptable calquera rubor.

¹⁷Avergónzate da fornicación diante de teu pai e de túa nai, e diante do principal e o maior, pola mentira;

¹⁸da falsidade ante o dono e a ama; diante da asemblea do pobo, por un crime; ante o compañeiro e veciño, pola traizón;

¹⁹no lugar da túa morada, por un roubo, por non manter compromisos xurados, por afincar os cóbados na mesa, por refugar un don que se che pide;

²⁰por facer o xordo a quen te saúda, por fitar muller allea

²¹por non recoñecer a un amigo, por impedir o reparto das partillas; por frecuentar a súa criada;

²²diante do amigo, por verbas inxuriosas, e despois de facer un don, por botalo en cara;