Read Biblia SEPT Eclesiástico 42 Bible Online

Eclesiástico 42 - Biblia SEPT bible

Eclesiástico 42

¹de repetir unha verba que escoitaches e descubrir un plano secreto. Deste xeito avergonzaríaste de verdade atopando favor ós ollos de todos. Mais do seguinte non te avergonces nin teñas respectos pecaminosos:

²da Lei do Altísimo e do mandato, do dereito, ata absolver un culpado,

³de facer as contas co socio e o patrón, de distribuír a herdanza e a facenda,

⁴de limpar a balanza e os pratiños, de comprobar a medida e o peso, dun prezo de venda nin moi alto nin moi baixo,

⁵de axustar o mercado co tratante; de corrixir os fillos a miúdo e de escorrerlle o sangue do lombo ó criado túzaro;

⁶de atrancar con ferrollo a muller viciosa e botar chave onde anden mans lixeiras;

⁷de levar conta do que che deixan en depósito e ter anotado no libro o debe e o haber;

⁸de corrixir ó desasisado e ó inxenuo e ó vello decrépito que coa luxuria perdeu os cascos. Dese xeito serás verdadeiramente sabido e home de ben ante todo vivente.

⁹Para un pai unha filla é un tesouro incerto, coa preocupación lévalle o sono: de moza, que se non vai casar, de casada, que se a van repudiar;

¹⁰cando é virxe, por se lla violan, vivindo no lar do marido, para que non sexa infiel; no lar de seu pai, que non fique preñada, no lar do seu home, que non sexa estéril.

¹¹Filliño, vixía a túa rapaza non che vaia procurar mala sona, murmurios na cidade, escarnio do pobo, e che cause deshonra na asemblea da porta. Na súa alcoba, nada de fiestras, nin peza con accesos visible pola volta.

¹²Que non amose a súa beleza a home ningún nin vaia rexoubar no xineceo,

¹³pois, se dun vestido sae a couza, dunha muller sae a malicia doutra.

¹⁴Mellor é malicia de home ca boas maneiras de muller, e moza deshonrada carrexa baldón. PARTE SEGUNDA: Libro da Grandeza de Deus

¹⁵Quero lembrar as obras de Deus, contarei canto teño contemplado: Pola palabra de Deus foron creadas e foi instrución del que fagan a súa vontade.

¹⁶Coma o sol do abrente resplandece sobre todo, así a gloria do Señor sobre todas as obras.

¹⁷Nin os santos de Deus foron tales de narraren as marabillas do Señor. Concede Deus a forza ós seus exércitos para se manteren rexos na presenza da súa maxestade.

¹⁸El sonda o abismo ó igual có corazón e inquire todos os seus segredos, porque o Altísimo coñece todo o coñecible e albisca os signos do mundo futuro,

¹⁹manifesta o pasado e o vindeiro e desvela o celme dos misterios.

²⁰Non lle foxe saber ningún, non hai cousa que se lle esconda.

²¹A magnitude da súa Sabedoría está ben confirmada desde a eternidade é o único sen que se lle poida engadir ou quitar e non precisa de sabidos.

²²Non son por caso admirables todas as súas obras sendo só unha faísca o que delas se ve?

²³El vive e permanece para sempre e, en canto se precisa, escoita a todos.

²⁴Calquera cousa é diversa doutra mais nada fixo en van.

²⁵Unha supera a outra na perfección e quen se dará farto de contemplar beleza tal?