Read Biblia SEPT Eclesiástico 44 Bible Online

Eclesiástico 44 - Biblia SEPT bible

Eclesiástico 44

¹Farei loanza dos homes de ben, dos nosos devanceiros, pola súa orde;

²o Altísimo concedeulles unha gloria inmensa e engrandeceunos desde días antigos:

³A gobernantes do país, pola dignidade real, a homes famosos, polos seus grandes feitos, a conselleiros, pola súa habelencia, a visionarios universais, polas súas profecías,

⁴A príncipes de nacións, pola súa perspicacia, a maxistrados, pola súa profundidade, a razoadores tribunos, pola súa elocuencia, a relatores de sentencias, pola súa vixilancia da tradición,

⁵A compositores de cántigas segundo as normas, a escolmadores de refráns por escrito,

⁶homes ricos e cheos de poder que viviron pacíficos nas súas moradas;

⁷todos eles foron distinguidos entre os seus contemporáneos e glorificados xa no seu tempo;

⁸máis dun deixou tras de si un nome que vai unido á súa herdanza.

⁹Doutros non se conserva a lembranza, ó eles finaren, acabouse, e foron como se non existisen, e outro tanto os seus fillos despois deles.

¹⁰Mais estes foron homes virtuosos e a súa esperanza non tivo fin;

¹¹na súa prole mantense a felicidade e a súa herdanza chega ata os seus netos;

¹²os descendentes manteñen os seus compromisos e, polo medio deles, tamén os netos;

¹³A súa lembranza permanece eternamente, non se borrará a súa caridade;

¹⁴o seu corpo foi enterrado en paz, a súa sona vive por idades sen termo;

¹⁵A súa Sabedoría cóntaa a comunidade, o seu loor repíteo a asemblea.

¹⁶Henoc foi atopado íntegro no seu camiñar co Señor, exemplo de mística para todas as xeracións.

¹⁷Noé, home xusto, foi encontrado perfecto; no tempo do exterminio foi coma un reconciliador, por el subsistiu un resto, polo seu pacto cesou o diluvio,

¹⁸concluído con el por medio dun sinal eterno de xeito que non fosen aniquilados todos os viventes.

¹⁹Abraham foi pai dunha chea de nacións, no seu honor non se atopa chata

²⁰pois observou os mandatos do Altísimo e estableceu con El unha alianza tallando na súa carne o que lle fora prescrito e amosándose fiel na proba.

²¹Por iso prometeulle con xuramento bendicir as nacións na súa posteridade multiplicándoo coma o po da terra e exaltando ós seus descendentes coma astros, concedéndolles unha herdanza de mar a mar desde o Éufrates ata as lindes do mundo.

²²Tamén con Isaac fixo o mesmo en razón de seu pai Abraham.

²³A alianza de todos os devanceiros pousou e a bendición descendeu sobre a cabeza de Israel. Confirmouno na bendición e deulle a súa herdanza. Organizouno en tribos, dividiuno nunha ducia de grupos.