Read Biblia SEPT Eclesiástico 45 Bible Online

Eclesiástico 45 - Biblia SEPT bible

Eclesiástico 45

¹Del saíu un home que atopou favor ós ollos de todo vivente, amado de Deus e dos homes: Moisés, de feliz lembranza.

²Constituíuno Elohim e fíxoo potente entre os ilustres;

³Á súa palabra acelerou os signos, fortaleceuno diante do rei, púxoo ó mando do seu pobo e reveloulle a súa gloria.

⁴Pola súa fidelidade e sinxeleza escolleuno de entre todos os viventes;

⁵fíxolle escoitar a súa voz e deixouno aproximarse á mesta nube; puxo na súa man o mandato, a lei da vida e a comprensión dela, para que ensinase a Xacob os seus decretos e os seus preceptos e dereito a Israel.

⁶Soergueu a outro santo, Aharón, da tribo de Leví,

⁷instituíndoo cun decreto eterno, impoñéndolle a dignidade para que fixese o servizo da súa gloria; cinguiuno coa forza do búfalo, vestiuno co manto de honor.

⁸Revestiuno de ornamentos magníficos, adornándoo con alfaias preciosas, cos calzóns, a túnica e o manto;

⁹púxolle, todo en torno, campaíñas cunha morea de granadas arredor que repinicasen harmoniosas ó camiñar, de xeito que a súa música se oíse no Santo dos Santos, coma memorial para os fillos do pobo;

¹⁰vestimentas sagradas de ouro e púrpura e vermellas, traballo de bordador, o peitoral do xuízo, o Efod e o cinto, o pano escarlata, feitura do tecedor;

¹¹As xoias sobre o saquiño peitoral, as tallas nos selos engastados, cunha inscrición incisa para a lembranza segundo o número das tribos de Israel;

¹²A coroa de ouro no turbante e a lámina coa inscrición: "Santo", dignidade gloriosa, poderosa nobreza, delicia para os ollos, fermosura perfecta.

¹³Antes del non houbo nada semellante, endexamais non as vestira un profano; soamente un de seus fillos e os fillos deles conforme as xenealoxías.

¹⁴As súas oblacións consómense totalmente, dúas veces no día sen interrupción.

¹⁵Consagrouno Moisés unxíndoo co aceite sacro; isto foi para el un compromiso eterno e para a súa proxenie, mentres o ceo dure de xeito que sirvan a Deus e fagan de sacerdotes, e bendigan ó pobo no seu nome.

¹⁶Escolleuno de entre todos os viventes para que presente o holocausto e as graxas, para fumegar o aroma suave e o memorial e para expiar polos fillos de Israel.

¹⁷Encargouno dos seus mandamentos, deulle poder sobre decretos e dereito, para que ensinase ó seu pobo o prescrito e a súa lei ós fillos de Israel.

¹⁸Algúns profanos acendéronse contra el, envexándoo no deserto: xentes de Datán e Abirán co grupo dos de Coré, cheos de carraxe.

¹⁹O Señor, ó velo, encheuse de ira e exterminounos na súa ardente xenreira; fíxolles vir enriba un prodixio, a labarada do seu lume que os engulipou.

²⁰En troques a Aharón acrecentoulle o honor determinándolle a súa herdanza e asignándolle por xantar as primicias sagradas

²¹para que coman das ofrendas do Señor: o pan da presentación é a súa parte, don para el e para a súa descendencia.

²²Soamente na terra non terán herdanza nin percibirán posesións de entre eles; partilla e herdanza súa son as oblacións do Señor no medio dos fillos de Israel.

²³Tras el vén Pinhás, fillo de Elazar, coma terceiro en sona polas súas fazañas; no seu celo polo Deus do universo mantívose na brecha a favor do seu pobo, e co seu nobre corazón fixo expiación polos fillos de Israel.

²⁴Con el estableceu tamén un decreto, o contrato pacífico de manter o Santuario de xeito que fose del e da súa prole o Sumo Sacerdocio para sempre;

²⁵pois se ben a alianza con David, o fillo de Iexé, da tribo de Xudá, é herdanza individual en razón da súa dignidade, a herdanza de Aharón pasa a todos os descendentes. E agora, bendicide ó Señor, o bo, que vos coroou de gloria.

²⁶Déavos El a Sabedoría do corazón para gobernardes con xustiza ó seu pobo e para que El non se esqueza da nosa felicidade e da vosa grandeza por xeracións sen conta.