Read Biblia SEPT Eclesiástico 46 Bible Online

Eclesiástico 46 - Biblia SEPT bible

Eclesiástico 46

¹Heroico guerreiro foi Xosué, fillo de Nun, axudante de Moisés no oficio profético, creado para acadar nos seus días unha grande vitoria a prol dos elixidos vingándose dos inimigos e distribuíndo a herdanza a Israel.

²Que glorioso cando tendía o brazo ou cando brandía a lanza en contra dunha vila!

³Quen foi tal de lle facer fronte cando loitaba as guerras do Señor?

⁴Non se detivo o sol ó seu mandado trocando un día en dous?

⁵Pois invocou ó Deus Altísimo cando arredor o envolvían os inimigos e o Deus Altísimo respondeu con pedras de sarabia e de xeo,

⁶dando con elas sobre o pobo adversario e destruíndo na "Baixada" ós rebeldes, de xeito que todo este pobo consagrado ó exterminio soubese que era Iavé quen dirixía as súas batallas.

⁷E por riba diso, dado que seguira a Deus en todo e se mantivera fiel no tempo de Moisés xunto con Caleb, fillo de Iefuné, resistindo á subversión da asemblea para afastaren a ira da comunidade e facer cesar a maliciosa murmuración,

⁸foron gardados só os dous de entre seiscentos mil homes de a pé para seren introducidos na súa herdanza nunha terra que deita leite e mel.

⁹A Caleb concedeulle Deus un tal pulo, que lle había durar ata a vellez, para facelo subir ata os altos do país e que a súa posteridade conservase tamén a herdanza,

¹⁰e para que deste xeito toda a descendencia de Xacob se decatase de que é boa cousa dedicarse de cheo ó Señor.

¹¹Doutra banda están os Xuíces con cadanseu nome, todos persoas que non deixaron perverter o seu ánimo e non se apartaron de Deus: Bendita sexa a súa lembranza!

¹²Que os seus ósos reflorezan na cova e a súa sona se renove nos seus fillos!

¹³Querido do pobo e predilecto do seu facedor, chamado desde o ventre da súa nai, consagrado do Señor para profeta, foi Samuel, xuíz e sacerdote. Por mandado de Deus instituíu a monarquía e unxiu príncipes sobre o pobo.

¹⁴Gobernou a comunidade segundo os mandamentos do Señor inspeccionando as tendas de Xacob;

¹⁵pola súa fidelidade foi consultado coma vidente e pola súa palabra deuse fe a un pastor.

¹⁶Tamén el invocou a Deus cando o envolvían os seus inimigos ó tempo que sacrificaba un año mamote;

¹⁷tronou o Señor desde o ceo e a súa voz oíuse cun estrondo terrible;

¹⁸esnaquizou os caudillos adversarios e destruíu a todos os príncipes filisteos.

¹⁹Cando xacía no seu leito puxo por testemuñas ó Señor e ó seu Unxido: —"De quen xamais aceptei un regalo ou un par de sandalias?" e ninguén lle puido responder.

²⁰Aínda despois do seu pasamento fixéronlle consultas e prediciulle ó rei o seu futuro, facendo xurdir da terra a súa voz profética.