Read Biblia SEPT Eclesiástico 47 Bible Online

Eclesiástico 47 - Biblia SEPT bible

Eclesiástico 47

¹Despois del xurdiu Natán para servir a David,

²pois o mesmo que se reserva a graxa do sacrificio así foi escolleito David entre Israel.

³Xogaba cos leonciños coma con cabuxas e cos osos coma con años.

⁴De rapazote matou un xigante afastando así a infamia do pobo, xirando coa man a fonda para destruír o orgullo de Goliat,

⁵xa que invocara a Deus Altísimo que reforzou a súa destra para que derrubase a un experimentado guerreiro e refixese o vigor do seu pobo;

⁶por iso cantábanlle as rapazas celebrándoo polos "dez mil".

⁷Cinguida a coroa, seguiu loitando pois someteu todos os inimigos ó seu arredor, desbaratando ós filisteos que ata o día de hoxe non se refixeron.

⁸Por todos os seus feitos daba as grazas ó Deus Altísimo, proclamando a súa gloria; amaba de todo corazón ó seu facedor e todos os días lle cantaba himnos.

⁹Dispuxo instrumentos musicais diante do altar e harmonizou co salterio o canto dos himnos;

¹⁰deu grande brillo ás festas e regulou as solemnidades anuais; cando loaba o seu santo Nome antes do amencer facía resoar o Santuario.

¹¹Deste xeito o Señor perdoou a súa culpa e exaltou eternamente o seu poderío, concedeulle a institución monárquica fundándolle o trono en Xerusalén.

¹²Por mor del sucedeulle un fillo sabio que viviu en tranquilidade,

¹³Salomón, que reinou en tempos prósperos. Deus concedeulle paz ó seu arredor para que erguese unha casa ó seu Nome e fundase un templo perenne.

¹⁴Que sabio fuches na túa mocidade rebordando instrución coma un Nilo!

¹⁵Enchiches o país coa túa intelixencia cubríndoo coa harmonía do teu canto.

¹⁶A túa sona viaxaba ata as apartadas illas e fuches desexado polo teu reino pacífico.

¹⁷Cos teus cantos, refráns, enigmas e ditos agudos deixaches abraiados ós pobos,

¹⁸e déronche un nome glorioso que aínda se invoca a prol de Israel. Mais amoreaches ouro coma ferro e acugulaches prata coma chumbo;

¹⁹entregaches os teus lombos ás mulleres e permitiches que dominasen no teu corpo;

²⁰botaches unha chata ó teu honor profanando o teu leito, atraendo a ira sobre a túa descendencia e saloucos sobre a túa cama;

²¹dividindo ó pobo en dúas estirpes e soerguendo en Efraím un reino rebelde.

²²Deus, non obstante, non retirou a súa piedade nin deixará caer ningunha das súas promesas; non extingue a prole nin a caste dos seus elixidos nin aniquila a descendencia dos seus amigos, senón que concedeu a Xacob un resto e a David unha raiceira da súa caste.

²³Salomón repousou desilusionado. Deixou tras si un fillo, home de grande tolemia e desasisado, que coa súa política revirou o pobo. Entón xurdiu —nin se faga lembranza del— o que, pecando, fixo pecar a Israel introducindo o escándalo en Efraím

²⁴Ata facelo deportar do seu país. O seu pecado foi enorme

²⁵dándose a todos os vezos.