Read Biblia SEPT Eclesiástico 48 Bible Online

Eclesiástico 48 - Biblia SEPT bible

Eclesiástico 48

¹Ata xurdir un profeta semellante ó lume, con verbas que foron coma un forno aceso.

²Este quitoulles o sustento do pan e no seu celo decimounos;

³coa palabra de Deus pechou os ceos e fixo descender lume por tres veces.

⁴Que terrible fuches, Elías! Gloria a quen te semelle!

⁵Ti soerguiches da morte un cadáver tirándoo do Xeol co favor do Señor;

⁶reis fixeches baixar para a cova e principais desde os seus leitos.

⁷Ti escoitaches no Sinaí as reprensións e no Horeb os xuízos de vinganza;

⁸ti unxiches reis que levasen a cabo o desquite e deixaches no teu posto un profeta que te sucedese;

⁹ti fuches arrincado no alto por un trebón entre escuadróns de lume, ata o ceo;

¹⁰ti estás reservado —segundo a Escritura— para o instante xusto de proclamar a carraxe antes de que chegue o día do Señor, para reconciliar os pais cos fillos e restaurar as tribos de Israel.

¹¹Feliz quen te poida ver antes de morrer! Con todo, máis feliz aínda ti, que vives.

¹²Cando Elías desapareceu no trebón quedou Eliseo, cheo do seu espírito; este multiplicou por dous os signos e todo canto saíu da súa boca foi prodixioso. De vivo non cedeu ante ninguén nin houbo quen dominase no seu espírito.

¹³Nada lle foi imposible e mesmo se reanimaban os corpos debaixo del;

¹⁴mentres viviu fixo milagres e de morto, cousas sorprendentes,

¹⁵e, non obstante, o pobo non se converteu nin cesou de pecar ata que foron arrincados do país e espallados por toda a terra. Pouco quedou de Xudá cun príncipe da casa de David.

¹⁶Algúns deles actuaron rectamente, mais outros fixeron maldades insospeitadas.

¹⁷Ezequías fortificou a súa cidade levando as augas ó seu interior; furou co bronce as rochas e fixo represas entre os montes para construír encoros.

¹⁸No seu tempo xurdiu Senaquerib que enviou ó seu Rab-Saqué para que tendese o brazo contra Sión blasfemando de Deus na súa fachenda.

¹⁹Daquela cederon na soberbia dos seus corazóns ó se retorceren coma muller en parto

²⁰e invocaron ó Deus Altísimo tendendo cara a El as mans. Escoitou o Señor a súa pregaria e salvounos por medio de Isaías,

²¹batendo no campamento de Asur e aniquilándoos coa peste,

²²pois Ezequías fixo o ben manténdose nas vías de David segundo a recomendación de Isaías, o profeta, grande e preciso nos seus presaxios;

²³polo seu medio o sol recuou prolongándolle ó rei a vida,

²⁴co seu espírito potente viu o futuro e deu consolo ós aflixidos de Sión;

²⁵Anunciou as cousas vindeiras ata a fin dos tempos, e o máis oculto antes de que sucedese.