Read Biblia SEPT Eclesiástico 49 Bible Online

Eclesiástico 49 - Biblia SEPT bible

Eclesiástico 49

¹O nome de Ioxías é coma incenso recendente, ben mesturado, arte de perfumista; a súa lembranza é doce coma o mel no padal coma unha cántiga nun banquete,

²pois entristeceuse cos nosos extravíos e fixo cesar as vas abominacións;

³dedicou a Deus por enteiro o seu corazón e en tempos de violencia foi piadoso;

⁴fóra de David, Ezequías e Ioxías, todos prevaricaron; abandonaron a Lei do Altísimo, os reis de Xudá, ata o derradeiro,

⁵que cedeu o seu poder a outro e a súa dignidade a un pobo estranxeiro,

⁶que meteu lume á santa cidade e baleirou as súas rúas

⁷conforme o de Xeremías cando o asoballaron, quen xa desde o ventre foi formado para profeta, para demoler, arrincar e derrubar, mais tamén para destruír, plantar e restaurar.

⁸Ezequiel tivo unha aparición e describiu a fasquía do carro;

⁹tamén fixo lembranza de Xob que foi consumado nas xeiras da xustiza.

¹⁰Dígase o mesmo dos doce profetas —reflorézanlles os ósos na cova!— Eles sandaron a Xacob e salvárono coa súa rexa esperanza.

¹¹Que grande foi Zerubabel! Foi coma selo na man dereita.

¹²Outro tanto Iexúa, fillo de Iosédec; no seu tempo reconstruíuse o altar e reedificouse o santo templo destinado a unha gloria perdurable.

¹³Nehemías, como brilla a súa lembranza! El soergueu as nosas ruínas, reparou as fendas dos nosos muros, repuxo portas e ferrollos.

¹⁴Poucos houbo na terra coa feitura de Henoc! Tamén el foi arrebatado en persoa.

¹⁵Non naceu ningún semellante a Xosé; mesmo o seu corpo foi gardado con veneración; primoxénito entre os irmáns, honra do seu pobo.

¹⁶Xem, Xet e máis Enox foron enxalzados, mais a sona de Adam sobresae á de todo vivente.