Read Biblia SEPT Eclesiástico 5 Bible Online

Eclesiástico 5 - Biblia SEPT bible

Eclesiástico 5

¹Non te apoies nas túas riquezas nin digas: —"Está no meu poder".

²Non te apoies na túa forza seguindo os impulsos do teu devezo.

³Non digas: —"Quen poderá comigo?", pois Iavé pide contas de canto sucede.

⁴Non digas: —"Pequei e que me aconteceu?", só porque Deus é paciente.

⁵Non contes co perdón para engadires culpa á culpa

⁶dicindo: —"Grande é a súa misericordia e perdoará a multitude dos meus pecados". Pois nel van xuntas misericordia e ira e sobre os malvados envorca a súa carraxe.

⁷Non tardes en volver a El, nin o deixes dun día para outro, pois xorde de súpeto o seu furor e no día da vinganza perecerás.

⁸Non poñas a confianza nas riquezas inxustas que non che han valer no día da carraxe.

⁹Non aventes a todo vento nin xires para onde vaian as espigas;

¹⁰tente firme nas túas conviccións e sexa unha a túa palabra.

¹¹Se pronto para escoitares e calmo ó responderes.

¹²Se podes, responde ó teu veciño; e se non podes, pon a man na boca.

¹³Honor e vergonza fican a carón do paroleiro e a lingua do home é a súa ruína.

¹⁴Non collas sona de home dobrado nin aldraxes coa túa lingua, pois para o ladrón creouse a vergonza e o escarnio severo para o de falar dobrado.

¹⁵Non fagas mal nin pouco nin moito, non pases de ser amigo a ser inimigo,