Read Biblia SEPT Eclesiástico 51 Bible Online

Eclesiástico 51 - Biblia SEPT bible

Eclesiástico 51

¹Quero loarte, meu Deus, meu salvador, e darche as grazas, Deus de meu pai, celebrar o teu nome, refuxio da miña vida,

²pois liberaches a miña alma da morte e preservaches o meu corpo da cova librando os meus pés do poder do Xeol, librándome da zorregada da lingua e dos labios que propagan mentiras; puxécheste a meu carón contra os meus adversarios.

³Acorréchesme coa túa grande piedade salvándome da trampa dos que espreitaban trala rocha e do poder dos que atentaban contra a miña vida, e de angustias sen número,

⁴da estreitura das labaradas que me rodeaban, do incendio dun lume inextinguible,

⁵do ventre profundo do océano, dos labios impuros e argalleiros de mentiras, das frechas dunha lingua falsa.

⁶Xa estaba eu a morrer e afundido no Xeol,

⁷volvíame arredor sen ninguén que me acorrese, procuraba un apoio e non o había,

⁸cando lembrei a piedade do Señor e as súas bondades permanentes de quen salva a cantos a El se acollen rescatándoos de todo mal.

⁹Lancei o meu berro desde a terra, pedín axuda desde as portas do inferno;

¹⁰gritei: —"Señor, ti es o meu pai, es ti o meu heroe salvador, non me deixes no día da angustia, no tempo da desfeita e da destrución;

¹¹loarei de continuo o teu nome, lembrareite na miña pregaria". Daquela escoitou o Señor a miña voz e oíu a miña súplica;

¹²libroume de todo mal, salvoume no día da angustia; por iso doulle grazas e enxálzoo bendicindo o nome do Señor. I Loade o Señor porque é bó porque a súa bondade non ten fin; II Loade o Deus das gabanzas porque a súa bondade non ten fin; III Loade o protector de Israel porque a súa bondade non ten fin; IV Loade o creador do universo porque a súa bondade non ten fin; V Loade o redentor de Israel porque a súa bondade non ten fin; VI Loade o que xunta os dispersos de Israel porque a súa bondade non ten fin; VII Loade o construtor da súa cidade e Santuario porque a súa bondade non ten fin; VIII Loade o que fai renovarse a forza da casa de David porque a súa bondade non ten fin; IX Loade o que elixe sacerdote de entre os fillos de Sadoc porque a súa bondade non ten fin; X Loade o escudo de Abraham porque a súa bondade non ten fin; XI Loade a rocha(...)

¹³Cando eu era novo, antes de me pór a viaxar devecín por ela e procureina;

¹⁴veume arredor e eu seguireina ata a fin.

¹⁵Coma cando cae a flor ó madurecer os acios, aledouse nela o meu corazón; o meu pé seguiu fielmente as súas pegadas: desde a miña mocidade estudei a Sabedoría.

¹⁶Tendinlle un pouco o meu oído e adquirín grande coñecemento;

¹⁷o seu xugo foi para min glorioso e doulle grazas a quen me ensinou.

¹⁸Resolvín procurala e non tiven que avergonzarme cando a atopei.

¹⁹A miña alma apegouse a ela e xa non a deixei de vista. A miña man abriu a súa porta, contemplei a súa intimidade e atopeina pura.

²⁰Deime a seguila e xa non me afastarei dela endexamais. No meu ánimo desposeina desde o comezo, e por iso xa non a abandonarei.

²¹Coma un forno ardían as miñas entrañas ó ollala, por iso conseguina coma posesión prezada.

²²Concedeume o Señor o éxito cos labios, coa miña lingua heille dar as grazas.

²³Achegádevos onda min, ignorantes, e instaládevos na miña escola.

²⁴Por canto tempo seguiredes baleiros de tantas cousas e as vosas almas tan sedentas?

²⁵Abro a boca e exhórtovos: —"adquiride gratis Sabedoría,

²⁶sometede o pescozo ó seu xugo e cargue a vosa alma co seu peso; fica ela preto dos que a procuran e quen se aplica atópaa".

²⁷Ollade vós mesmos que, sendo eu ben pouco, púxenme á súa beira, e atopeina.

²⁸Escoitade o meu ensino por pequeno que sexa e con el adquiriredes prata e ouro.

²⁹Alédase o meu ánimo nos meus alumnos; non teredes de que vos avergonzar co meu canto.

³⁰Facede con xustiza as vosas obras e Deus daravos o premio ó seu tempo. Bendito sexa o Señor para sempre, e loado o seu Nome de xeración en xeración. Ata aquí, as verbas de Simeón, ben Iexúa, de sobrenome Ben Sírah. Sabedoría de Simeón, fillo de Iexúa, fillo de Elazar, fillo de Sírah. O Nome do Señor sexa bendito desde agora e para sempre.