Read Biblia SEPT Eclesiástico 6 Bible Online

Eclesiástico 6 - Biblia SEPT bible

Eclesiástico 6

¹pois mal nome e aldraxe son produto da infamia e tal sucede co malvado de lingua dobrada.

²Non caias no poder da túa paixón pois consumirá o teu vigor,

³devorará as túas follas, arrincará os teus froitos deixarate coma unha árbore seca;

⁴xa que a paixón violenta abate ós que a posúen e convérteos en motivo de troula dos seus inimigos.

⁵Unha fala xeitosa multiplica os amigos, uns labios graciosos atraen saúdos.

⁶Ten moitas relacións, mais, coma confidente, un de entre mil.

⁷Se fas un amigo, faino despois da proba, non fíes de contado nel.

⁸Pois amigos hai que van co tempo e non resisten nos días difíciles.

⁹Amigo hai que se troca en inimigo e descobre despois as túas liortas vergoñentas.

¹⁰Amigo hai, compañeiro de mesa, que non se atopa no día da desfeita;

¹¹mentres teñas facenda, estará ó teu carón; vaiche mal, e apártase de ti;

¹²se te atrapa a desgraza, vólvese en contra túa, escóndese da túa presenza.

¹³Arreda dos teus inimigos, ten coidado cos teus amigos.

¹⁴Amigo fiel, amigo seguro, quen o atopa, encontra un tesouro.

¹⁵Amigo leal non ten prezo, non hai quen pese o seu valer.

¹⁶Coma talismán para a saúde é o amigo leal, quen teme a Deus acádao.

¹⁷Quen teme a Deus dirixe rectamente a súa amizade; tal coma un é, tal é o seu amigo.

¹⁸Meu fillo, desde a túa mocidade acolle a instrución e ata a ancianidade acadarás Sabedoría;

¹⁹Achégate a ela coma quen ara ou sega e espera colleita farturenta, pois no seu cultivo terás que traballar un pouco mais axiña xantarás dos seus froitos.

²⁰Ela é espiñenta para o necio e insoportable para o mal asisado;

²¹Afunde nel coma pedra pesada: non tardará en desbotala;

²²pois a iniciación é coma o que amosa o seu nome, inaccesible para moitos.

²³Escoita, meu fillo, e acolle o meu ensino e non refugues o meu consello.

²⁴Mete os pés nos seus cepos e o pescozo no seu xugo;

²⁵baixa as costas e carga con ela, que non te irriten as súas cordas.

²⁶Achégate a ela con toda a alma e con toda a túa forza garda os seus camiños.

²⁷Procura, inquire, busca e encontrarás, se pillas a instrución non a ceibes;

²⁸pois ó remate, atoparás o seu acougo e converteráseche en firme deleite,

²⁹Aquelas redes súas trocaránseche en firme alicerce e as súas ataduras en adobío de pan de ouro;

³⁰o seu xugo, en diadema dourada; os seus lazos, en liñas de púrpura;

³¹vestiralas coma traxe de festa cinguiralas coma coroa de luxo.

³²Filliño, se ti queres, podes chegar a Sabio, se pos todo o teu tino, volveraste prudente;

³³se tes arelas de escoitar, aprenderás, se prestas oído, haste instruír;

³⁴preséntate na xuntanza dos anciáns e se hai algún Sabio, apégate a el;

³⁵Atende gustoso calquera discurso e non che fuxa un dito agudo;

³⁶observa quen é o intelixente e corre cedo a visitalo e que os teus pés desgasten a soleira da súa porta.

³⁷Cavila no temor do Altísimo e de continuo medita os seus mandados. El ilustrará a túa intelixencia, farate Sabio canto desexes.