Read Biblia SEPT Eclesiástico 7 Bible Online

Eclesiástico 7 - Biblia SEPT bible

Eclesiástico 7

¹Non fagas o mal e non che virá o mal.

²Afástate da culpa e ela apartará de ti.

³Non sementes nos sucos da inxustiza, non teñas que recoller sete por un.

⁴Non pidas a Deus un mando nin ó rei un posto honorífico.

⁵Non te gabes de xusto perante Deus nin te fagas o sabido diante do rei.

⁶Non areles gobernar se non tes valor para controlar a fachenda, non sexa que te intimides diante dun príncipe e botes unha chata na túa integridade.

⁷Non deas motivo de ser condenado na reunión da porta para non seres humillado na asemblea.

⁸Non te endurezas ata repetir un pecado pois aínda cun só non fuxirás impune.

⁹Non digas: —"Terá El en conta a morea das miñas ofrendas; cando lle faga un don ó Deus Altísimo, aceptarao".

¹⁰Non sexas impaciente na pregaria nin deixes a esmola para máis adiante.

¹¹Non aldraxes o home magoado, pensa que hai quen exalta e humilla.

¹²Non matines violencia contra teu irmán nin contra o veciño e compañeiro;

¹³non te afagas a dicir unha mentira despois doutra pois o remate non sería feliz;

¹⁴non esbardalles na reunión dos príncipes nin repitas verbas na pregaria.

¹⁵Non refugues a tarefa penosa nin o traballo do campo, disposto por Deus.

¹⁶Non te deas aires de importante entre a xente da aldea: ten en conta que a xenreira non tardaría.

¹⁷Abaixa todo o que poidas a túa fachenda, que o que lle espera ó home son os vermes. Non te apresures a falar e cambiar de opinión; consulta a Deus e conténtate co que dispón.

¹⁸Non troques un amigo por unha fortuna nin un irmán verdadeiro polo ouro de Ofir;

¹⁹non despreces unha muller discreta; se por riba é xeitosa, vale máis do que as perlas.

²⁰Non asoballes o criado fiel nin o xornaleiro que pon todo o seu esforzo;

²¹Ama coma a ti mesmo ó criado intelixente e non lle denegues a liberdade.

²²Tes gando? — Teno do teu ollo; se che é útil, consérvao.

²³Tes fillos? — Edúcaos e procúralles muller cando aínda son novos.

²⁴Tes fillas? — Vixía os seus corpos e non lles amoses unha faciana condescendente.

²⁵Casa a filla e irase a preocupación, mais cásaa con home asisado.

²⁶Tes muller? — Non a repudies; mais se non a queres, non te fíes dela.

²⁷Honra a teu pai de todo corazón e non esquezas as dores de túa nai;

²⁸lembra que naciches grazas a eles; con que lles vas poder compensar o que por ti fixeron?

²⁹Con todo o ánimo teme a Deus e trata ós seus sacerdotes coma cousa santa.

³⁰Ama ó teu Facedor con todas as túas forzas e non abandones os seus ministros.

³¹Honra a Deus e respecta o sacerdote, dálle a súa parte como está prescrito: a carne dos holocaustos, a ofrenda das mans, os sacrificios de rigor, e o tributo sagrado.

³²Tende tamén ó pobre a túa man para que a túa bendición sexa cumprida.

³³Fai agasallos a todos os viventes; tampouco non lles negues a piedade ós mortos.

³⁴Non fuxas dos que choran, fai o pranto cos enloitados.

³⁵Que o teu ánimo non refugue ó doente e serás amado del.

³⁶En todas as túas accións lembra a fin e endexamais non pecarás.