Read Biblia SEPT Eclesiástico 8 Bible Online

Eclesiástico 8 - Biblia SEPT bible

Eclesiástico 8

¹Non teñas preito con home poderoso, non vaias dar nas súas mans.

²Non rifes con home adiñeirado, non vaia medir o teu prezo e te perdas; pois o ouro fai finchados ós grandes e a riqueza desvaría a mente dos príncipes.

³Non discutas co lingoreteiro para non botares leña ó lume.

⁴Non teñas trato co necio para que non se burle das xentes nobres.

⁵Non escarnezas a quen se converte do pecado, lembra que todos somos culpables.

⁶Non poñas en apuros ó home de idade, que tamén nós imos chegar a vellos.

⁷Non te aledes por un morto, lembra que todos imos morrer.

⁸Non desbotes as razóns dos sabios, ocúpate nos seus enigmas; pois neles aprenderás a tradición e poderaste presentar diante de príncipes.

⁹Non descoides as historias dos anciáns, que eles pola súa banda escoitaron de seus pais, pois con elas adquirirás prudencia para saberes dar resposta cando cómpre.

¹⁰Non atices as brasas do pecador para non te queimares coa súa labarada.

¹¹Non cedas diante do cínico para que non prepare a emboscada ante ti.

¹²Non prestes a quen é máis forte ca ti; se lle prestaches, teno por perdido.

¹³Non saias fiador por máis do que podes; se xa te comprometiches, considérate debedor.

¹⁴Non fagas preito a un xuíz, pois xulgará o que lle veña ben.

¹⁵Non fagas viaxe cun temerario para non agrandar os teus males; pois el vai dereito ó seu e ti terás que pagar pola súa tolemia.

¹⁶Non sexas teimudo co irascible nin viaxes á beira del polo camiño, pois para el é cousa de nada o esparexer sangue e desfarase de ti onde non teñas quen te acorra.

¹⁷Non consultes co inxenuo pois non sabe gardar un segredo.

¹⁸Diante dun forasteiro non fagas nada sospeitoso pois non sabes o que el pode deducir.

¹⁹Non descubras a túa mente a calquera para non escorrentar a felicidade de onda ti.