Read Biblia SEPT Eclesiástico 9 Bible Online

Eclesiástico 9 - Biblia SEPT bible

Eclesiástico 9

¹Non teñas celos da túa propia muller para non ensinarlle a ser maliciosa contigo.

²Non te entregues de todo á túa muller para que non che pise as costas.

³Non te achegues á muller allea para non caeres nas súas redes. Non teñas tratos con prostituta, non te vaia cazar coas súas mañas.

⁴Non lles botes piropos ás cantantes, non te vaian queimar coas súas boquiñas.

⁵Non poñas o ollo na moza nova para non levares castigo por culpa súa.

⁶Non te entregues a unha prostituta para non disipar a túa herdanza

⁷ficando por tolo ós teus propios ollos e arruinando por riba o teu casal.

⁸Afasta a vista da muller fermosa e non olles para unha beleza que non é túa. Por unha muller pérdense moitos, e o seu amor queima coma o lume.

⁹Non xantes cunha muller casada nin roldes bébedo na súa compaña, para que non te arrastre a ela o corazón e despois, sangrando, descendas á cova.

¹⁰Non deixes amigo vello, pois o novo non o iguala. Amigo novo é viño novo: cando envelleza, beberalo.

¹¹Non envexes o perverso pois ignoras cando lle virá o seu día.

¹²Non envexes a fachenda do afortunado; pensa que no día da morte non ficará impune.

¹³Tente lonxe do home capaz de matar e non terás terrores mortais; se te lle achegas non fagas faltas para que non che arrinque o alento da vida; leva conta de que marchas entre trampas e que camiñas sobre unha rede.

¹⁴Na medida en que poidas ten trato co veciño e consulta cos sabios;

¹⁵sexa a túa conversa co asisado e con eles, todos os teus segredos.

¹⁶Sexan os teus comensais xente de ben e pon no temor de Deus a túa gloria.

¹⁷Con mans hábiles mantense o dereito e goberna ó seu pobo o home elocuente.

¹⁸Témenlle na cidade ó bardallas e renegan das laretadas da súa boca.