Read Biblia SEPT Isaías 11 Bible Online

Isaías 11 - Biblia SEPT bible

Isaías 11

¹Sairá un xermolo do pé da árbore de Ixaí e un gromo brotará da súa raíz.

²Descansará sobre el o Espírito do Señor, espírito de sabedoría e discernimento, espírito de consello e fortaleza, espírito de ciencia e temor do Señor.

³Sentirá a súa compracencia no temor do Señor. Non xulgará conforme a aparencia dos seus ollos, nin sentenciará conforme as lerias dos seus oídos.

⁴Xulgará ó pobre conforme a xustiza, e sentenciará con rectitude ós oprimidos da nación. Castigará ó violento coa vara da súa boca, e co espírito dos seus labios matará ó malvado.

⁵Será a xustiza o cinguideiro da súa cintura e a fidelidade o cinguideiro do seu lombo.

⁶O lobo habitará co carneiro e o leopardo deitarase co cabrito; o becerro e o leonciño pacerán xuntos: un meniño pequeno sacaraos ó pasto.

⁷A vaca e a osa pacerán xuntas, xuntas deitaranse as súas crías; o león, o mesmo có boi, comerá palla.

⁸Un meniño de leite xogará no tobo da cobra, e un neno destetado collerá a víbora coa súa man.

⁹Ningún será malvado nin fará o mal en todo o meu monte santo: o país estará cheo de coñecemento do Señor, o mesmo que as augas enchen o mar.

¹⁰Sucederá o día aquel que a raíz de Ixaí estará ergueita de bandeira das nacións,os pobos procurarana, e a gloria será o seu lugar de descanso.

¹¹Sucederá o día aquel que volverá o meu Señor a levantar a súa man, para redimir o resto do seu pobo, os poucos que quedaron de Asiria (e de Exipto e de Patrós, de Cux e de Elam, de Xinar, de Hamat e das illas do mar).

¹²Levantará a bandeira entre os pobos, xuntará os dispersados de Israel, recollerá os esparexidos de Xudá das catro bandas do mundo.

¹³Cesará a envexa de Efraím, e Xudá deixará de oprimir; Efraím xa non terá celos de Xudá, e Xudá xa non oprimirá a Efraím.

¹⁴Correrán cara ó mar ombreiro con ombreiro contra os filisteos; xuntos saquearán ós pobos do nacente: Edom e Moab serán presa da súa man, e os fillos de Amón estarán sometidos á súa obediencia.

¹⁵O Señor deixará seco o golfo do mar de Exipto, e moverá a súa man contra o Éufrates; co ardor do seu alento romperao en sete brazos, e fará que se poida pasar con sandalias.

¹⁶Haberá unha calzada para o resto do seu pobo, para os que quedaron en Asiria, o mesmo que a houbo para Israel, o día que subiu do país de Exipto.