Read Biblia SEPT Isaías 16 Bible Online

Isaías 16 - Biblia SEPT bible

Isaías 16

¹Mandade carneiros dos señores do país, desde o Penedo do Deserto, ó monte da filla de Sión.

²Pois o mesmo cós paxaros espantados ou unha niñada escorrentada, serán as fillas de Moab nos vaos do Arnón.

³Presenta ti un plan, toma unha decisión. Converte a túa sombra en noite á luz do mediodía, esconde ó fuxido, ó escapado non o descubras.

⁴Que vivan contigo coma estranxeiros os fuxitivos de Moab. Serás ti a súa protección ante o devastador. Cando se acabe a opresión, desapareza o asolamento, e o asoballador desapareza completamente do país,

⁵establecerase un trono de amor e reinará con fidelidade na tenda de David un que xulgue con xusto xuízo e que sexa perito na xustiza.

⁶Oímos falar da soberbia de Moab, da súa soberbia que vén de antigo, da súa fachenda, do seu orgullo e do seu furor, das súas lerias que non son verdade.

⁷Por isto xeme Moab, todo Moab xeme, polas doces uvas de Quir Harés quéixanse os aflixidos.

⁸Os campos de Hexbón están murchos e o mesmo as viñas de Sibmah: nas súas cepas selectas mallaron os señores das nacións. Chegaban ata Iazer, perdíanse no deserto, as súas vides estendíanse, cruzaban o mar.

⁹Por isto vou chorar, ó mesmo tempo ca Iazer, polas viñas de Sibmah. Vouvos regar coas miñas bágoas, Hexbón e Elaleh, porque as cántigas desapareceron da túa seitura e da túa colleita.

¹⁰Desaparecen dos campos a alegría e o xúbilo e nas viñas non se brinca de ledicia, non se danza co gozo. As uvas nas tallas xa non as pisa o viñateiro, vin desaparecer a canción da vendima.

¹¹Por isto as miñas entrañas tremen por Moab, coma unha arpa, e o meu interior treme por Quir Harés.

¹²Verase que se esforza Moab por subir ó outeiro, intenta ir ó seu santuario rezar, pero non pode.

¹³Esta é a palabra que o Señor lle falou desde antigo a Moab,

¹⁴pero agora o Señor di así: "Dentro de tres anos, día a día coma anos de mercenario, a gloria de Moab xunto con toda a súa xente volverase desprezable, e o seu resto será pequeniño de todo e sen poder".