Read Biblia SEPT Isaías 2 Bible Online

Isaías 2 - Biblia SEPT bible

Isaías 2

¹Palabras que en visión profética recibiu Isaías, fillo de Amós, acerca de Xudá e Xerusalén:

²Vede: á fin dos días será creado o monte da Casa do Señor. Vede: será levantado por enriba dos montes e máis cós petoutos, xuntaranse nel todas as xentes.

³Irán a el pobos numerosos que dirán: "Vinde, subamos ó monte do Señor, á casa do Deus de Xacob, para que nos mostre os seus camiños, e camiñemos polos seus vieiros. Vede: de Sión sairá a Lei, a Palabra do Señor sairá de Xerusalén".

⁴Xulgará os preitos entre as xentes, decidirá o que é xusto entre os pobos. Coas espadas forxarán arados; coas lanzas, podas. Non levantará un pobo contra outro a espada, nin aprenderán de novo a facer a guerra.

⁵Casa de Xacob, ven; vaiamos e camiñemos á luz do Señor!

⁶Olla: vou destruír o teu pobo! Destruirei a Casa de Xacob! Está cheo de adiviños desde oriente ata os filisteos; e sóbranlle fillos de estranxeiros.

⁷A súa capital está chea de prata e ouro, non teñen fin os seus tesouros. A súa cidade está chea de cabalos, os seus carros non teñen fin.

⁸A súa cidade está chea de ídolos, próstranse diante da feitura das súas mans, diante do que fixeron os seus dedos.

⁹Abaixaranse os homes, humillaranse os varóns, pero non os ergas.

¹⁰Métete entre as pedras, escóndete entre o po, lonxe da presenza pavorosa do Señor, lonxe do esplendor da súa maxestade.

¹¹Os ollos orgullosos abaixaranse, serán dobrados os homes ergueitos, soamente o Señor será enxalzado naquel día.

¹²Velaquí o día do Señor Todopoderoso: contra todo o alto e levantado, contra todo o ergueito e admirable.

¹³Contra todos os cedros do Líbano altos e levantados, contra todos os carballos de Baxán.

¹⁴Contra todas as altas montañas, contra todos os petoutos ergueitos.

¹⁵Contra toda torre esgrevia, contra todo muro inaccesible.

¹⁶Contra todos os barcos de Tárxix, contra todas as naves esperadas.

¹⁷O Señor dobrará o orgullo do varón, humillará a soberbia dos homes. Enxalzarase o Señor, El só, naquel día;

¹⁸El ocupará o lugar de todos os ídolos.

¹⁹Entrade nas fendas dos penedos, nas gretas do xabre e da barreira, lonxe da cara do Señor, lonxe do esplendor da súa maxestade, cando El se levante para estarrecer a cidade.

²⁰Aquel día os homes botarán fóra os ídolos de prata, e os ídolos que fixeron co seu ouro, para adoraren toupeiras e morcegos.

²¹Entrade nas fendas dos penedos e nas regañas das pedras, lonxe da cara terrible do Señor, lonxe do esplendor da súa maxestade, cando El se levante para estarrecer a cidade.

²²Deixade de tratar entre vós co home a quen esmagan o nariz: foi el quen inventou de seu o culto dos altos.