Read Biblia SEPT Isaías 27 Bible Online

Isaías 27 - Biblia SEPT bible

Isaías 27

¹No día aquel o Señor castigará coa súa espada dura, grande e poderosa, a Leviatán, a serpente fuxidía, a Leviatán, a serpente retorcida, matará o dragón que hai no mar.

²No día aquel cantádelle á viña deliciosa:

³Eu, o Señor, son o seu gardián, regareina decote, non se castigarán as súas débedas. Protexereina de día e de noite,

⁴non precisarei alpendre de garda. Quen ma encheu de silvas e espiños? Eu avanzarei en guerra contra el e consumirao o meu lume.

⁵Ou, se non, que se aferre á miña protección e que faga a paz comigo, que a paz comigo faga.

⁶Chega o día no que enraizará Xacob, florecerá e botará gromos Israel, e as súas vides encherán a face do mundo.

⁷Dá Deus un golpe coma o que feriu a Xacob? Ou mata con puñalada, coma a dos que o feriron?

⁸Axotándoos, botándoos fóra, fas o teu xuízo contra eles; espállalos por causa da súa crueldade, nun día de vento leste.

⁹Con isto quedará expiada a iniquidade de Xacob, este será o seu froito, que afastará o seu pecado: cando El deixe en anacos as pedras dos seus altares, cando non se levanten imaxes de Axerah nin estelas cúlticas.

¹⁰A cidade fortificada quedará soa, un lugar despoboado e abandonado coma o deserto, alí pacerá o xato e alí se tombará e destruirá os xermolos.

¹¹Cando sequen os seus xermolos, fenderanos as mulleres que anden a buscar con que prender o lume. Certo, non é un pobo intelixente, por iso o seu creador non ten compaixón del, o que o formou non ten piedade del.

¹²Sucederá no día aquel que o Señor empezará a dar paus desde o curso do Éufrates ata o regato de Exipto, e vós seredes reunidos un por un, fillos de Israel.

¹³Sucederá no día aquel que se tocará cun corno grande, e virán os abandonados no país de Asiria, e os dispersados polo país de Exipto, e prostaranse diante do Señor na montaña santa, en Xerusalén.