Read Biblia SEPT Isaías 3 Bible Online

Isaías 3 - Biblia SEPT bible

Isaías 3

¹Si, velaí o Señor, Deus dos Exércitos: retirará de Xerusalén e de Xudá bastón e apoio, todo apoio de comida e todo apoio de bebida:

²capitán e soldado, xuíz e profeta, adiviño e senador;

³oficial e dignitario; conselleiro, experto en bruxerías e coñecedor de feitizos.

⁴Poñereilles a rapaces por xefes, gobernaranos uns meniños caprichosos.

⁵A xente atacará unha á outra, cada un ó seu veciño; o mesmo rapaz portarase aleivosamente co ancián venerable, os ruíns cos nobres.

⁶Cada un usará a violencia contra o seu irmán, contra a propia familia: "Tes un vestido, pois fai ti de xefe: colle o mando desta ruína".

⁷O día aquel el erguerase para dicir: "Eu non son albeite nin teño na miña casa pan nin vestido: non me poñades de xefe do pobo".

⁸Velaí: derrúbase Xerusalén e cae Xudá, velaí os seus ditos e os seus feitos contra o Señor, rebelándose contra a súa presenza gloriosa.

⁹A estrañeza da faciana testemuña contra eles, mostran coma Sodoma o seu pecado: non o encobren. Ai deles! Como consuman a súa propia ruína!

¹⁰Ollade, que feliz o xusto! Como consome o froito dos seus traballos!

¹¹Ai do malvado! Que desgraciado! Como actuarán contra el as obras das súas mans!

¹²Meu pobo, os que o oprimen son xente caprichosa: gobérnano mulleres. Meu pobo, os teus directores fante andar descarreirado, enredan a dirección dos teus vieiros.

¹³O Señor está de pé para preitear, está firme para xulgar o seu pobo.

¹⁴O Señor entra en preito cos senadores e príncipes do seu pobo: "Vós arrasastes a viña: tendes nas vosas casas o roubado ós pobres.

¹⁵Que facedes? Esmagades o meu pobo, e oprimides a faciana dos pobres?" —Oráculo do Señor, Deus dos Exércitos—.

¹⁶O Señor di: "Xa que se ensoberbecen as fillas de Sión, e camiñan co pescozo arrichado e ollos pintados de rubio, xa que camiñan a pasiños miúdos, e nos nocellos levan ariños",

¹⁷o Señor halles de apegar a sarna á súa cabeza, Iavé halles descubrir a súa fronte.

¹⁸O día aquel o Señor quitaralles os seus adornos: ariños para os nocellos, diademas e medias lúas,

¹⁹pendentes, pulseiras e veos,

²⁰panos da cabeza, cadeíñas para os pés e cintos, caixas de talismáns e amuletos,

²¹Aneis e ariños para o nariz,

²²vestidos de festa, abrigos, estolas e bolsos,

²³vestidos de gasa e vestidos de liño, turbantes e touquiñas.

²⁴En vez de perfume haberá podremia; en vez de cinto, corda; en vez de peiteado de trenzas, calva; en vez de lenzo fino, un cinguideiro de saco. En vez de fermosura, vergonza.

²⁵Os teus homes caerán pola espada; e os teus escolleitos, na guerra.

²⁶As xuntanzas das súas portas lamentaranse e farán loito, e ela sentarase desolada no chan.