Read Biblia SEPT Isaías 31 Bible Online

Isaías 31 - Biblia SEPT bible

Isaías 31

¹Ai dos que baixan a Exipto por axuda! Apóianse nos cabalos, confían nos moitos carros, e nos tiros de cabalos, tantísimos son!, pero non ollan para o Santo de Israel nin buscan ó Señor.

²El é o único Sabio, que leva adiante o seu plan, e non deixa que fallen as súas palabras: levantarase contra a nación dos malvados e contra a axuda dos que cometen a iniquidade.

³Exipto é home e non deus, os seus cabalos son carne e non espírito, por isto, o Señor estenderá a súa man; e caerá quen axuda xunto co axudado: os dous xuntos perecerán.

⁴Díxome así o Señor: "Como roxe o león, o cachorro do león, pola súa presa, cando acode contra el o grupo de pastores, que cos seus berros non o asustan nin co seu barullo o espantan, así baixará o Señor dos Exércitos para facer guerra sobre o monte Sión, sobre o seu outeiro.

⁵Coma bandadas de paxariños en voo, así botará o Señor dos Exércitos o seu escudo sobre Xerusalén, botará o escudo e salvará; estará de garda e rescatará".

⁶Volvédevos a Aquel de quen tanto se apartaron os fillos de Israel.

⁷Porque no día aquel cada un rexeitará os ídolos de prata e os ídolos de ouro que as vosas mans de pecado fixeron para vós.

⁸Asiria caerá coa espada daquel que non é home, será devorada pola espada daquel que non é humano. Asiria andará fuxida por medo á espada e os seus mellores irán a traballos forzados.

⁹O seu Penedo escapará co terror e os seus xenerais abandonarán a bandeira —quen fala é o Señor que ten o fogar en Sión, e o forno en Xerusalén.—