Read Biblia SEPT Isaías 35 Bible Online

Isaías 35 - Biblia SEPT bible

Isaías 35

¹Que se alegren o deserto e mais a terra reseca, que brinque de ledicia a estepa e que floreza! Que, coma a lis,

²floreza abundantemente, que brinque en exultante danza! Concedéuselle a gloria do Líbano, o esplendor do Carmelo e do Xarón. Eles mesmos verán a gloria do Señor, o esplendor do noso Deus.

³Fortalecede as mans adormecidas, e ponde firmes os xeonllos que tremen.

⁴Dicídelles ós de corazón tímido: "Collede ánimo, non temades. Velaí o voso Deus. Chega a vinganza, a recompensa de Deus. Chega El mesmo, e salvaravos".

⁵Entón abriranse os ollos dos cegos, e os oídos dos xordos destaparanse.

⁶Entón o coxo saltará coma un corzo e a lingua do mudo cantará xubilosa. Si, saen á luz augas no deserto e ríos na estepa:

⁷A terra reseca convértese nunha lagoa, e a terra sedenta en mananciais de auga. No campo onde os chacais se tomban, a herba converterase en canivelas e xuncos.

⁸Alí haberá unha calzada, unha verea, e á calzada chamaráselle Vía Sacra. Nada impuro pasará por ela: o mesmo Señor camiñará con eles, e os homes non se desviarán.

⁹Non haberá alí león, e ningún animal salvaxe subirá, ningún se atopará. Por alí camiñarán os redimidos,

¹⁰e os rescatados do Señor volverán por ela, entrarán en Sión con xúbilo, felicidade eterna sobre as súas cabezas. Conseguirán ledicia e felicidade, pois o sufrimento e o pranto fuxirán.