Read Biblia SEPT Isaías 45 Bible Online

Isaías 45 - Biblia SEPT bible

Isaías 45

¹Así fala o Señor acerca do seu unxido, Ciro, a quen eu collín da man dereita: el someterá ante si ós pobos, eu descubrirei ante el o lombo dos reis. El abre ante si os portóns dobres, as portas non se pecharán ante el.

²Eu camiñarei diante de ti e fareiche favorables os presaxios, romperei os batentes de bronce e farei anacos as trancas de ferro.

³Dareiche os tesouros pechados e as riquezas dos lugares ocultos, para que recoñezas que eu son o Señor, quen te chamou polo teu nome, son o Deus de Israel que te chamou

⁴por causa do meu servo, Xacob, e de Israel, o meu elixido. Si, chameite polo teu nome; creeite, aínda que non me coñecías.

⁵Eu son o Señor e non hai outro, fóra de min non hai deus. Ameite, aínda que non me coñecías,

⁶para que se saiba desde o nacente ó solpor que non hai cousa sen min. Eu son o Señor e non hai outro,

⁷o que forma a luz e crea a tebra, o que fai a felicidade e crea a desgraza. Eu, o Señor, o que fago todas estas cousas.

⁸Ceo, fai caer desde arriba; bóveda celeste, bota para abaixo a xustiza, que a terra se abra e dea como froito a salvación, que a xustiza faga brotar a felicidade. Eu, o Señor, son quen a crea.

⁹Ai do que preitea con quen o formou! Ai do cacharro que preitea con quen o fixo do barro! Dille a ola a quen a formou: "Que fas? A túa obra non ten xeito!"

¹⁰Ai de quen lle di ó pai: "Que xeraches?", e á súa nai: "Que deches a luz?!"

¹¹Así fala o Señor, o Santo de Israel, o que o formou: "Ídesme pedir contas do futuro dos meus fillos, e ides dar ordes sobre a obra das miñas mans?

¹²Eu fixen a terra e creei o home sobre ela. Eu, coas miñas propias mans estendín o ceo, deilles ordes a todas as súas constelacións.

¹³Eu suscitei a Ciro por causa da xustiza e achanceille todos os seus vieiros. El reconstruirá a miña cidade e mandará alí os meus exiliados, sen prezo nin regalo".

¹⁴Así fala o Señor: "A man de obra de Exipto, os traficantes de Cux, os sebaís, homes de grande estatura, virán onda ti e serán teus, camiñarán detrás de ti con cadeas, virán prostarse ante ti e confesarán: Soamente contigo está Deus e non hai outro; non hai máis deuses".

¹⁵Certo, ti es o Deus escondido, o Deus de Israel, o Salvador.

¹⁶Avergonzaranse, cubriranse de oprobio todos eles, camiñarán con oprobio os tallistas de ídolos.

¹⁷Israel será salvado polo Señor con salvación eterna: Non vos teredes que avergonzar e endexamais non vos cubriredes de oprobio.

¹⁸Si, así fala o Señor, o Creador do ceo, El é Deus, o formador da terra e o seu facer, El creouna, non a creou coma un caos, formouna para ser habitada. "Eu son Iavé e non hai outro.

¹⁹Non falei en secreto, nun lugar do inferno, na escuridade. Non lle dixen á descendencia de Xacob: buscádeme no abismo. Eu, o Señor, proclamo a xustiza, dou a coñecer a rectitude".

²⁰Xuntádevos! Vinde! Achegádevos a un tempo, escapados das nacións: Que non o saiban os que levan en alto ese pau, o seu ídolo, e os que lle rezan a un deus que non é capaz de salvar.

²¹Expoñede, presentade as vosas probas; aconselládevos uns cos outros. "Quen fixo oír isto desde antigo? Quen o fixo saber desde o tempo pasado? Acaso non fun eu, o Señor? Si, non hai outro Deus fóra de min! Eu son Deus, o Xusto e o Salvador, non hai outro fóra de min.

²²Volvédevos cara a min e salvádevos, todos os confíns da terra, que eu son Deus, e non hai outro.

²³Xúroo por min mesmo: da miña boca sae —para cumprir o que é xusto— unha palabra que non se volve atrás: ante min dobrarase todo xeonllo, por min xurará toda lingua.

²⁴De min dirase: Si, no Señor están a xustiza e o poder". Onda El virán, avergonzados, todos os que se levantaron contra El.

²⁵Toda a descendencia de Xacob recibirá a xustiza de parte do Señor e nel se gloriará.