Read Biblia SEPT Isaías 64 Bible Online

Isaías 64 - Biblia SEPT bible

Isaías 64

¹o mesmo que se lle prende lume á bouza e o lume fai burbullar a auga, para lles facer coñecer o teu nome ós teus inimigos, para que estremezan os pobos coa túa presenza,

²ó faceres cousas temibles que non esperamos. Baixaches, (e) coa túa presenza tremeron os montes:

³unha cousa que desde antigo nunca se oíra, (pero) certo que se nos fixo escoitar: O ollo non viu fóra de ti ningún deus, que tal lle faga a quen espera nel.

⁴Atopácheste co que se alegraba e practicara a xustiza, cos que se lembraban de ti nos teus vieiros. Velaí: estabas enfadado porque pecaramos, (pero) estaremos sempre nos teus vieiros e salvarémonos.

⁵Todos nós fomos coma un impuro, e toda a nosa xustiza como a roupa da que ten a menstruación. Todos nós murchamos coma a folla, e as nosas iniquidades leváronnos coma o vento.

⁶Non había quen invocase o teu nome, quen espertase para acollerse a ti, porque ti escondíchesnos a túa cara, e alagáchesnos co lote das nosas culpas.

⁷Pero agora, Señor, ti es o noso Pai. Nós somos o barro e ti es o oleiro, pois obra das túas mans somos todos nós.

⁸Señor, non te enfades aínda máis, non te lembres para sempre da iniquidade. Olla, fíxate ben: todos nós somos o teu pobo.

⁹As túas santas vilas están feitas un deserto, Sión quedou feita un deserto, Xerusalén unha desolación.

¹⁰O noso santo e glorioso templo, onde te adoraron os nosos pais, volveuse unha fornalleira de lume, e todas as nosas cousas apreciadas resultaron unha ruína.

¹¹Ante estas cousas vaste seguir contendo, Señor, seguir calado e oprimirnos aínda máis?