Read Biblia SEPT Isaías 7 Bible Online

Isaías 7 - Biblia SEPT bible

Isaías 7

¹No tempo do rei de Xudá, Acaz, fillo de Iotán, fillo de Ozías, subiron a Xerusalén Resín, rei de Siria e Pécah, fillo de Remalías, rei de Israel, atacárona, pero non foron capaces de a conquistar.

²Daquela chegou a noticia á descendencia de David nestes termos: "Os sirios están acampados en Efraím"; estremeceuse o seu corazón e mais o corazón do seu pobo, o mesmo que se estremecen as árbores do souto en presenza do vento.

³Entón díxolle o Señor a Isaías: "Saíde ó encontro de Acaz, ti e mais o fillo que se chama Sear Yasub, ó cruce da canle do Estanque de Arriba co camiño que vai ó campo do bataneiro.

⁴Haslle dicir: Atento: ten moita calma, non teñas medo e que o teu corazón non se afrouxe por eses dos dous tizóns que fumegan: a rabia de Resín de Aram e do fillo de Remalías.

⁵Porque Aram aconselloulles calamidades contra ti a Efraím e ó fillo de Remalías, dicíndolles:

⁶Subamos contra Xudá e infundámoslle pavor; abramos brecha contra ela e constituamos rei nela ó fillo de Tabel".

⁷Así fala o Señor Iavé: "Isto non se cumprirá nin sucederá,

⁸pois Damasco é a capital de Aram, e a cabeza de Damasco é Resín (ó cabo de sesenta e cinco anos Efraím deixará de ser un pobo);

⁹A capital de Efraím é Samaría, e a cabeza de Samaría é o fillo de Remalías. Vós non credes. Pois non subsistiredes!"

¹⁰O Señor volveulle falar a Acaz nestes termos:

¹¹"Pide para ti un sinal de parte do Señor, o teu Deus, nas profundidades do Xeol ou arriba nas alturas".

¹²Respondeu Acaz: "Non o pido, pois non quero poñer a proba ó Señor".

¹³Entón dixo Isaías: "Escoitade vós, casa de David: Non vos é pouco dominar os homes, que aínda queredes dominar o meu Deus?

¹⁴Por isto, o meu Señor daravos El mesmo un sinal: Velaí a doncela: está en cinta e dá a luz un fillo, ó que lle pon de nome Emmanuel;

¹⁵comerá nata e mel, xa que saberá rexeitar o mal e escoller o ben.

¹⁶Aínda antes de que o meniño saiba rexeitar o mal e escoller o ben, serán abandonados os países dos dous reis ante os que ti tremes.

¹⁷O Señor fará vir sobre ti, sobre o teu pobo e sobre a casa do teu pai, días que non viñeron desde que se apartou Efraím de Xudá. Coa axuda do rei de Asiria,

¹⁸sucederá o día aquel, que o Señor lles asubiará ás moscas que están alá nas canles do Nilo en Exipto e ás abellas que hai no país de Asiria;

¹⁹virán todas e pousarán nos regueiros das quebradas e nas fendas das penas, nas silveiras todas e nos augadoiros.

²⁰O día aquel afeitará o meu Señor, con navalla de aluguer de alén do Éufrates, ó rei de Asiria: a cabeza e os pelos das pernas, e tamén a barba.

²¹Sucederá o día aquel, que cada un poderá manter unha xovenca de gando grande e un par de reses do rabaño.

²²Producirase tanto leite que se comerá nata. Si, quen fique no país comerá nata e mel.

²³Sucederá o día aquel, que calquera viñedo, con mil cepas por valor de mil moedas de prata, volverase unha silveira e un toxal.

²⁴Entrarase dentro del con frechas e con arco: todo o país será unha silveira e un toxal.

²⁵Tampouco se entrará nos soutos rozados coa sacha, por medo ás silveiras e ós toxos; todo quedará a monte: para meter bois e ser pisados das cabras".