Read Biblia SEPT Levítico 11 Bible Online

Levítico 11 - Biblia SEPT bible

Levítico 11

¹Faloulles o Señor a Moisés e a Aharón:

²—"Faládelles ós fillos de Israel e dicídelles: Estes son os animais que poderedes comer de entre todos os cuadrúpedes da terra:

³todo o que ten o pé rachado e mais a uña fendida e que remoe, podédelo comer.

⁴Pero de entre os que remoen ou teñen as uñas fendidas, non poderedes comelo camelo, que, aínda que remoe, non ten a uña fendida: será impuro para vós.

⁵O coello, que remoe, pero non ten o pé fendido, é impuro para vós.

⁶A lebre, que remoe, pero non ten o pé fendido, é impura para vós.

⁷O porco, que ten o pé rachado e a uña fendida, pero non remoe, é impuro para vós.

⁸Non comeredes da súa carne nin tocaredes o seu cadáver: son impuros para vós.

⁹De entre os que viven na auga podedes comer aqueles que teñen aletas e escamas, tanto que sexan de mar coma de río.

¹⁰Pero os que non teñen escamas, tanto de mar coma de río, todo réptil acuático e todo ser que vive na auga, serán abominación para vós.

¹¹Serán abominables para vós, non probaredes a súa carne e teredes noxo dos seus cadáveres.

¹²Todo o que non ten aletas nin escamas, será abominación para vós.

¹³Teredes noxo, e non comeredes de ningunha das seguintes castes de aves: a aguia, o voitre barbado, aguia de mar,

¹⁴o voitre, o falcón de calquera caste,

¹⁵todas as castes de corvos,

¹⁶A avestruz, a curuxa, a gaivota e todas as castes de gabián,

¹⁷o moucho, o somorgullo e o ibis;

¹⁸o cisne, o pelicano e a grúa,

¹⁹A cegoña, e toda caste de garza, a bubela e o morcego.

²⁰Todo insecto con ás, que anda en catro patas, será abominable para vós.

²¹Con todo, de entre os que voan, poderedes comer soamente aqueles que amais dos catro pés teñen patas para choutar polo chan.

²²Os que poderedes comer son: toda caste de lagostas, de saltóns, cabaliños e grilos.

²³Calquera outro insecto con ás e de catro patas será abominable para vós.

²⁴Os seguintes animais contaminan: calquera que toque o cadáver dalgún destes bechos quedará impuro ata a tarde.

²⁵Aquel que leve ó lombo o cadáver dalgún deles, terá que lavar o seu vestido, e quedará impuro ata a tarde.

²⁶Todo vivente de pata con uña non fendida na punta do seu pé, e que non remoe, será impuro para vós. Quen o toque, quedará impuro.

²⁷De entre os cuadrúpedes serán impuros para vós todos os plantígrados. Quen toque o cadáver dalgún deles, quedará impuro ata a tarde.

²⁸O que leve ó lombo o cadáver deles, terá que lavar o seu vestido e quedará impuro ata a tarde.

²⁹De entre os réptiles serán impuros para vós os que se arrastran polo chan: a donicela, o rato e toda caste de lagartas.

³⁰O ourizo, o camaleón, o lagarto, a tartaruga e a toupa.

³¹Estes serán impuros para vós. Quen toque o cadáver dalgún deles, quedará impuro ata a tarde.

³²E todo aquilo no que caia o cadáver dalgún deles, será impuro. O mesmo que sexa un obxecto de pau coma de tecido, de coiro ou de esparto. En resume, calquera obxecto que sirva para algo, terá que ser metido na auga e quedará impuro ata a tarde. Despois será puro.

³³Se cae dentro dun cacharro de barro, todo canto teña nel faise impuro, e o cacharro terá que ser escachado.

³⁴Calquera alimento cociñado con auga no cacharro será impuro, e todo líquido potable que haxa dentro do cacharro será impuro.

³⁵Todo aquilo no que caia o cadáver dalgún destes, farase impuro. Tanto o forno, coma o trespés terán que ser destruídos. Son impuros e como tales os habedes de ter.

³⁶Con todo, as fontes e as cisternas, é dicir, os depósitos de auga, serán puras, a non ser que as toque algún cadáver destes, que as fará impuras.

³⁷Se algún destes cadáveres cae enriba dunha semente para sementar, a semente quedará pura.

³⁸Pero se o gran está mollado e cae enriba del un cadáver destes, quedará impuro para vós.

³⁹Se morre un animal do que se pode comer a carne, e alguén toca o seu cadáver, quedará impuro ata a tarde.

⁴⁰O que coma dese cadáver, terá que lavar o seu vestido e quedará impuro ata a tarde; o que leve ó lombo o cadáver, terá que lavar o seu vestido, e quedará impuro ata a tarde.

⁴¹Todo réptil que anda a rastro polo chan, será abominable: non se pode comer,

⁴²quen ande a rastro polo chan, quen ande en catro ou máis patas, de cantos se arrastran polo chan en ningún caso comeredes, por ser unha abominación.

⁴³Non vos contaminedes con ningún réptil, que se arrastra, non vos fagades impuros con el.

⁴⁴Pois eu son o Señor, o voso Deus: santificádevos para serdes santos, porque eu son santo. Non vos contaminedes con ningún réptil que se arrastra polo chan.

⁴⁵Eu son o Señor que vos fixen subir do país de Exipto, para ser o voso Deus: tendes que ser santos, pois eu son santo.

⁴⁶Esta é a lei referente ós cuadrúpedes, ás aves, a toda caste de bechos que viven na auga ou andan a rastro polo chan.

⁴⁷Saberedes diferenciar entre o puro e o impuro, e entre os animais que se poden comer e os que non se poden".