Read Biblia SEPT Levítico 17 Bible Online

Levítico 17 - Biblia SEPT bible

Levítico 17

¹Faloulle o Señor a Moisés:

²—"Fálalle a Aharón e ós seus fillos e a todos os israelitas e dilles: Esta é a orde, que vos dá o Señor nestas palabras:

³todo israelita que mate un boi, un año ou unha cabra no campamento ou fóra do campamento,

⁴sen o presentar antes na entrada da Tenda do Encontro, para o ofrecer en sacrificio ó Señor diante do seu tabernáculo, seralle imputado como delito de sangue por ter vertido sangue. Ese home será exterminado do medio do seu pobo.

⁵Por iso os israelitas han de levar as vítimas que adoitan ofrecer no campo, presentalas ó sacerdote á entrada da Tenda do Encontro, e ofrendalas ó Señor como sacrificio de comuñón.

⁶O sacerdote asperxerá co sangue o altar do Señor, que está á entrada da Tenda do Encontro e fará queimar a graxa como aroma agradable para o Señor.

⁷Non ofrecerán sacrificios ós sátiros cos que se prostitúen. Lei perpetua será esta para vós por todas as xeracións.

⁸Diraslles tamén: todo individuo da familia de Israel ou dos estranxeiros que moran no medio de vós, cando ofrece un holocausto ou un sacrificio,

⁹e non o leva á porta da Tenda do Encontro, para o sacrificar en honor do Señor, será exterminado do medio do seu pobo.

¹⁰Enfrontareime con calquera individuo da familia de Israel ou estranxeiro residente no medio voso, que coman sangue, e exterminareinos do seu pobo.

¹¹Pois a vida do corpo está no sangue, e eu dóuvolo para expiar con el sobre o altar polas vosas vidas. Porque é o sangue o que purifica a persoa.

¹²Por esta razón díxenlles ós fillos de Israel: Nin vós nin os estranxeiros que moran convosco comeredes sangue.

¹³Calquera israelita ou estranxeiro residente no medio de vós que cace algún animal ou ave dos que se poden comer, e verte o seu sangue, deberao tapar con terra.

¹⁴Pois, sendo a vida de toda carne o seu sangue, eu díxenlles ós fillos de Israel: Non comeredes o sangue de ningunha carne, porque a vida de toda carne é o seu sangue: quenquera que o coma será exterminado.

¹⁵Toda persoa nativa ou estranxeira que coma da carne dun animal morto ou esnaquizado, lavará a súa roupa, bañarase en auga, e quedará impuro ata a tarde; despois será puro.

¹⁶Pero se non se lava nin baña o seu corpo, cargará coa súa culpa".