Read Biblia SEPT Levítico 2 Bible Online

Levítico 2 - Biblia SEPT bible

Levítico 2

¹Se alguén quere facer unha oblación á honra do Señor, terá que ser de flor de fariña, engadíndolle aceite e botándolle incenso enriba.

²Deberállela presentar ós sacerdotes, fillos de Aharón. O sacerdote collerá dela unha presa da súa flor de fariña, parte do seu aceite e todo o incenso, e queimarao sobre o altar aceso, como lembranza de recendo para Iavé.

³O resto da oblación será para Aharón e para seus fillos, como porción máis santa do holocausto á honra do Señor.

⁴Cando ofrezas unha oblación cocida no forno, ha de ser un molete de flor de fariña sen fermento adobada con aceite, e boliños sen fermento amasados con aceite.

⁵Se a oblación fose fritida na tixola, ha de ser de flor de fariña sen fermento mesturada con aceite;

⁶cortarala en rebandas e botaraslle enriba aceite: é unha oblación.

⁷Se a túa oblación fose cocida, terá que ser de flor de fariña con aceite.

⁸Levarás, pois, ó Señor a ofrenda preparada destas diferentes maneiras e presentaraslla ó sacerdote, que a porá sobre o altar.

⁹O sacerdote quitará da oblación a lembranza e queimaraa no altar como holocausto de recendo para o Señor.

¹⁰O resto da oblación será para Aharón e para seus fillos, como porción máis santa do holocausto para o Señor.

¹¹Toda oblación que lle fagades ó Señor ha de ser preparada sen fermento, porque non se debe queimar en holocausto ó Señor ningunha ofrenda con fermento ou mel.

¹²Poderédelas ofrecer como oblación de primicias ó Señor, pero non as queimaredes no altar como recendo para o Señor.

¹³Ademais disto, sazonarás con sal toda oblación, endexamais faltará o sal da alianza do teu Deus en ningunha das túas ofrendas. Porás sal por riba de toda oblación túa.

¹⁴Se ofreces oblación de primicias ó Señor, presentarás espigas sen madurar, torradas no lume, debullando os seus grans tenros, como oblación das túas primicias;

¹⁵botaraslles aceite enriba e poraslles incenso, pois é unha oblación.

¹⁶O sacerdote queimará a lembranza, parte dos grans debullados e parte do aceite e todo o incenso, como holocausto para o Señor.