Read Biblia SEPT Levítico 22 Bible Online

Levítico 22 - Biblia SEPT bible

Levítico 22

¹Faloulle o Señor a Moisés:

²—"Dilles a Aharón e a seus fillos que fagan que os israelitas reverencien as miñas cousas santas, e non profanen o meu nome, que eles teñen que santificar. Eu son o Señor.

³Dilles: para todas as vosas xeracións, calquera da vosa raza, que, tendo algunha eiva, se achegue ás cousas santas consagradas polos israelitas ó Señor, será exterminado da miña presenza. Eu son o Señor.

⁴Ninguén da liñaxe de Aharón, afectado de lepra ou de gonorrea, poderá comer no santuario, namentres non se purifique; nin tampouco quen tocou o cadáver dun animal calquera ou tiver polución,

⁵Así como quen toque algún réptil impuro ou algún home no que haxa impureza de calquera caste.

⁶Quenquera que o toque, quedará impuro ata a tarde, e non poderá comer cousas sagradas en tanto non lave o seu corpo con auga.

⁷A posta do sol será puro de novo e poderá comer das cousas sagradas, pois elas son o seu alimento.

⁸Non poderá comer carne dun animal morto ou esnaquizado por unha fera: contaminaríase con el. Eu son o Señor.

⁹Gardarán os meus mandamentos, e así non cargarán co seu pecado nin morrerán por causa deste alimento, por se profanaren con el. Eu son o Señor, que os santifiquei.

¹⁰Ningún estraño comerá cousa sagrada, sexa hóspede do sacerdote, sexa o seu xornaleiro.

¹¹Se o sacerdote, con todo, adquire polo seu diñeiro unha persoa, ela poderá comer con el, e todos os que nazan na súa casa, poderán comer do seu alimento.

¹²A filla do sacerdote que casa cun estraño, non poderá comer do que se recolle no santuario.

¹³Con todo, a filla do sacerdote que enviúva ou foi repudiada sen ter fillos e torna á casa do pai e vive con el coma cando era solteira, poderá comer do alimento do pai; pero ningún estraño poderá comer do mesmo.

¹⁴Calquera que, sen se decatar, comese das cousas sagradas, restituiralle ó sacerdote a cousa mesma ademais dunha quinta parte da cousa sagrada.

¹⁵Non profanarán as cousas sagradas que os israelitas lle ofrezan ó Señor.

¹⁶Os que as coman, cargarán coa súa culpa, co delito de comeren das cousas sagradas, que santifiquei eu. Eu son o Señor".

¹⁷Faloulle o Señor a Moisés:

¹⁸—"Fálalles a Aharón e a seus fillos e a todos os fillos de Israel: Calquera israelita, ou estranxeiro residente entre os israelitas, que ofrezan como holocausto ó Señor un sacrificio por calquera clase de voto ou de promesa voluntaria,

¹⁹para que lle sexa aceptable, terá que ser macho sen tacha, bovino, ovino ou caprino.

²⁰Non ofrecerá nada defectuoso, pois non sería feito con boa intención pola vosa parte.

²¹Calquera que ofreza ó Señor un sacrificio de comuñón, para cumprir un voto ou por devoción espontánea, terá que ser de gando maior ou menor, pero sen tacha. Non terá ningún defecto.

²²Non ofreceredes ó Señor, nin queimaredes no seu altar vítima cega nin coxa nin manca nin a que teña algunha úlcera ou sarna ou algunha ferida.

²³Boi ou ovella desproporcionada ou pequeneira poderase ofrecer como sacrificio espontáneo, pero non será acepto para cumprir un voto.

²⁴Non ofreceredes ó Señor vítimas cos testículos sumidos ou esmagados ou arrincados ou cortados. Na vosa terra non ofreceredes vítimas desas.

²⁵Non ofreceredes, como alimento do voso Deus, ningunha vítima recollida da man dun forasteiro, se están cheas de defectos e tachas: non vos serían aceptables para ben voso".

²⁶Faloulle o Señor a Moisés:

²⁷—"O tenreiro, o año e o cabrito estarán coa nai os sete primeiros días despois de nacer. Do día oitavo para adiante será aceptable como ofrenda de holocausto para o Señor.

²⁸Non matarás no mesmo día un boi ou un carneiro xunto co seu fillo.

²⁹Cando ofrezades un sacrificio de loanza ó Señor, facédeo de maneira que vos sexa ben acolleito.

³⁰Comeredes a vítima no mesmo día en que a sacrificastes, sen deixar nada dela para a mañá seguinte. Eu son o Señor.

³¹Gardaredes os meus mandatos e cumprirédelos. Eu son o Señor.

³²Non profanaredes o meu nome santo. Eu hei de ser santificado no medio dos fillos de Israel, porque son eu, o Señor, quen vos santifica.

³³Saqueivos de Exipto para ser o voso Deus. Eu son o Señor".