Read Biblia SEPT Levítico 24 Bible Online

Levítico 24 - Biblia SEPT bible

Levítico 24

¹O Señor faloulle a Moisés:

²—"Manda ós fillos de Israel que che traian aceite de oliveira, puro e virxe, para acender o candelabro, e que se manteña sempre aceso.

³Aharón colocarao pola banda de fóra do veo da Tenda do testemuño, e arderá decote desde a tarde ata a mañá diante do Señor. É lei perpetua para todas as vosas xeracións.

⁴Disporás as candeas no candelabro de ouro puro, e alumarán decote diante do Señor.

⁵Collerás flor de fariña, e farás doce bolos de dúas décimas cada un,

⁶e disporalos en dúas filas, seis en cada unha enriba de mesa de ouro puro diante do Señor.

⁷Enriba de cada fila porás incenso puro, que será sobre o pan como recendo de lembranza para ser queimado na honra do Señor.

⁸Sempre cada sábado renovaralo diante do Señor. Será estatuto perpetuo para os fillos de Israel.

⁹Pertencerán a Aharón e ós seus fillos. Só eles o poderán comer no santuario, porque son cousa sagrada, recollida das ofrendas presentadas ó Señor e perténcelles a eles por dereito perpetuo".

¹⁰Xurdiu entre os israelitas un que era fillo de nai israelita e de pai exipcio, e pelexou cun israelita no campamento.

¹¹O fillo da muller israelita blasfemou contra o nome de Deus, e por iso foi levado onda Moisés (o nome da nai era Xelomit, filla de Dibrí, da tribo de Dan).

¹²Puxérono baixo garda ata que dixese o Señor o que tiñan que lle facer.

¹³Faloulle o Señor a Moisés:

¹⁴—"Levade o blasfemo fóra do campamento, que todos os que o oíron lle impoñan as súas mans sobre a cabeza, e que a comunidade toda o mate a pedradas.

¹⁵Despois diraslles ós israelitas: Calquera que aldraxe o nome do seu Deus, cargará co seu pecado.

¹⁶Quenquera que aldraxe o nome do Señor morrerá sen remedio. A comunidade toda terá que o matar a pedradas, sexa estranxeiro sexa nativo. Calquera que aldraxe o nome do Señor será matado.

¹⁷Se algún lle bate a outro ata o matar, será castigado coa morte.

¹⁸Quen mate un animal a golpes, terá que devolver outro: animal por animal.

¹⁹Calquera que lle faga dano ó seu próximo, faráselle a el o mesmo,

²⁰fenda por fenda, ollo por ollo, dente por dente. O que lle fixo ó outro, faráselle a el do mesmo xeito.

²¹O que mata un animal alleo, terá que o pagar; o que mata a un home, tamén será el matado.

²²Haberá entre vós un só xuízo para todos, o mesmo para o forasteiro e para o nativo. Eu son o Señor, Deus de todos vós".

²³Despois de lles falar Moisés ós israelitas, sacaron o blasfemo fóra do campamento e acantazárono todos os fillos de Israel, tal como lle ordenara o Señor a Moisés.